مانگرتنی رۆژهەڵات بەهۆی لەسێدارەدانی حەیدەر قوربانی و دەسبەسەرکرانی بەشداربووان و وتاربێژانی رێورەسمەکەی

23/12/2021

پێنجشەممە ٢ بەفرانباری ٢٧٢١ ک "٢٣٫١٢٫٢٠٢١ ز" لە بەشێک لە شارەکانی رۆژهەڵاتی کوردستان وەک سنە و کامیاران و بانە  بۆ ناڕەزایەتی دەربڕین بەرانبەر بە لەسێدارەدانی حەیدەر قوربانی کە لە ٢٨ی سەرماوەز بەشێوەی نهێنی لە بەندیخانەی سنە لەسێدارە درا مانگرتن بەڕێوەچوو.
وێڕای زەخت و گوشارە بەردەوامەکانی دەوڵەت و حەولیان بۆ رێگریکردن لە بەڕێوەچوونی رێوڕەسم و مان گرتن بۆ حەیدەر قوربانی، هێزە ئەمنییەکانی دەوڵەتی ئێران سیاسەتی دەسبەسرکردنی بەشداربووانی رێوڕەسمەکەیان گرتە بەر.
ئامانج قوربانی کە یەکێک لە ژینگەپارێزانی کامیارانە بەهۆی بەشداریی کردنی لە رێوڕەسمەکە لە سێشەممە ٣٠ سەرماوەزەوە دەسبەسەر کراوە.
هەروەها رۆژی چوارشەممە ١ بەفرانبار مامۆستا میرزا محەممەد رەحمانی کە مامۆستایەکی بەناوبانگی شاری کامیارانە، و تەمەنی ٥٠ ساڵانە، بەهۆی وتاربێژی لە رێوڕەسمەکە لەلایان هێزەکانی دەوڵەتەوە دەسبەسەرکراوە.
جێگای ئاماژەیە کە کارناسانی مافی مرۆڤی نەتەوە یەکگرتووەکان لە راگەیێندراوێکدا لەسێدارەدانی حەیدەر قوربانی بە توندی مەحکوم کردووە..