ڕاگەیەندراوی نوێنەرایەتی PAK لە دەرەوەی وڵات سەبارەت بە فریوکاریی جەنایەتکارانەی کۆماری ئیسلامی

26/10/2022

ڕاگەیەندراوی نوێنەرایەتی PAK لە دەرەوەی وڵات سەبارەت بە فریوکاریی جەنایەتکارانەی کۆماری ئیسلامی

ئێوارەی ئەمڕۆ چوارشەممە رێکەوتی 26 ئۆکتۆبری 2022,  لە کاتی نوێژی شێواندا، گرووپێکی چەکدار  هێرشیان کردە سەر مزگەوتی شاچرای شاری شیراز.
بەداخەوە لە ئاکامی ئەو تاوانەدا13 کەس کوژراون و بە دەیان کەسیش بریندار بوون.
بە ماوەیەکی زۆر کەم پاش هێرشەکە، ڕێکخراوی تیرۆریستیی  داعش بەرپرسیارێتییەکەی گرتە ئەستۆ کە ئەوە خۆی یەکێ لە نیشانەکانی نائاسایی بوونی ڕووداوەکەیە.
ھەموو ئاماژە و لێکدانەوەکان دەیسەلمێنن کە خوڵقاندنی ئەم تاوانە، ڕاست لە ڕۆژی چلەی ژینای شەھید و بڵێسە کێشانی ئاگری ڕاپەڕینی گەلانی ئێراندا،  پلان و عەمەلیاتێکی فریودەرانەی سەرانی کۆماری ئیسلامییە بۆ بەلاڕێدا بردنی بیروڕای گشتیی و کرانەوەی دەستی بۆ سەرکوتی زیاتر و خوڵقاندنی جینایەتی پتر. وەئەستۆ گرتنی خێرای ئەو هێرشە لە لایان داعشەوە، راستیی پێوەندی و ھاوکاریی نێوان ئێران و رێکخراوی تیرۆریستی داعش بە روونی دەردەخات.
پارتی ئازادیی کوردستان  وێڕای مەحکووم کردنی ئەو پیلانە دژی ئینسانییە و ریسوا کردنی سەرانی کۆماری ئیسلامی، داوا لە رێکخراوی نەتەوەیەکگرتووەکان و کۆڕ و کۆمەڵە نێودەوڵەتییەکان و رێکخراوەکانی مافی مرۆڤ دەکا، بەرانبەر تاوان و جینایەتەکانی کۆماری ئیسلامی ئێران لە حاست گەلانی راپەڕیوی ئێران بێدەنگ نەبن و بە کردەوە پێش بە کوشتار و رەشە کوژیی کۆمەڵانی خەڵک بگرن. ھەروەھا ھەواڵدەرییەکان و  ئاژانسەکانی ڕاگەیاندن وریا دەکەینەوە کە نەکەونە داوی عەمەلیاتی فریودەرانەی ئێران و دڵنیا بن کە داعش لە ژێر کۆنتڕۆڵی تاراندایە و ئەوەی بە ناوی داعشەوە لە ئێران ڕوو بدات، سیناریۆ و پلانی دام و دەزگا تێرۆریستییەکانی کۆماریئیسلامییە.
پارتی ئازادیی کوردستانPAK
دەستەی نوێنەرایەتیی دەرەوەی وڵات

٤ی خەزەڵوەری ٢٧٢٢ ک
٢٦ی ئۆکتۆبری ٢٠٢٢ز