بە مانگرتن و خۆپیشاندان؛ پێکەوە بۆ بەردەوامیی ڕاپەڕینی ڕاماڵینی داگیرکەر

05/12/2022

بە مانگرتن و خۆپیشاندان؛ پێکەوە بۆ بەردەوامیی ڕاپەڕینی ڕاماڵینی داگیرکەر 

کوردستانیانی ڕاپەڕیو لە سەروەریی و حوکمی داگیرکەر

  ڕاپەرینی دوومانگەی پێشوومان لە شێوازی خۆپیشاندان و مانگرتنەکاندا بۆ کۆتاییهێنان بە سەروەریی و حوکمی داگیرکەرانەی ئێران بە سەرمانەوە ؛ لاپەڕەیەکی دیکەی پڕ شانازیی لە مێژووی خەباتی ڕزگاریخوازیی نەتەوەیی کوردستان،تۆمار کردووە. بەم ڕاپەڕینە کە بووە چەخماخەی ڕاپەڕینی گشتیی هەموو گەلانی ئێران؛ ناو و ناوبانگی ئازادییخوازیی و کۆڵنەدان و بەرەنگاربوونەوەی نەتەوەی کورد بەرانبەر داگیرکەران و سیستەمە تووتالیتارییەکان و تێرۆریزمی ڕێکخراوەیی و دەوڵەتیی، گەشایەوە. ئەوەش دەسمایەکی سیاسیی گەورەیە بۆ ڕاکێشانی پشتیوانیی جیهانی ئازاد لە خەبات و ڕاپەڕین و ناسنامە و ئامانجەکانمان.
  ئێستا کە پتر لە دوو مانگ لەو ڕاپەڕینە پیرۆزە تێدەپەڕێ، ئاسۆی سەرکەوتنی ئێمە و ڕاماڵین و شکستی دوژمن لە هەموو کاتێ ڕوونترە. بۆیە پێویستە یەکگرتووانە، بە بەکارهێنانی ئەزموونی دوو مانگی ڕابردوو ،هاوتەریب لە گەڵ گەلانی ئێران، ڕاپەڕینی پیرۆزمان لە شێوازەکانی خۆپیشاندانی شەقام و گەڕەکەکان و مانگرتنی گشتیی، درێژە پێبدەین.
پارتی ئازادیی کوردستان هاوکات و هاوهەنگاو لە گەڵ چالاکانی ناوخۆی وڵات و ناوەندی هاوکاریی و لایەنەکانی دیکەی کوردستان و پاڵپشتیی کوردستانیانی دەرەوەی وڵات و میدیا دەربەستەکان، هیوادارە بەو ئامادەکارییانەی بە تێکۆشانی هەمووانی کراون، شار و شەقام و گەڕەک و خوێندنگە و زانکۆکانی کوردستان لە ڕۆژانی ١٤ و ١٥ و ١٦ی سەرماوەزدا، گۆڕەپان و دیمەنی مانگرتن و خۆپیشاندانی کوردستانیان بن.
پارتی ئازادیی کوردستان، داوا لە هەموو خەڵکی نیشتمانی زامدارمان دەکات، بە زیاترین ڕێژەی بەشداریی لە مانگرتن و خۆپیشاندانەکاندا، مەکینەی تاوان و زەبر و زەنگی دوژمن پەک بخەن.

سەرکەوێ ڕاپەڕینی ڕاماڵینی داگیرکەر لە نیشتمان

پارتی ئازادیی کوردستانPAK

١٣ی سەرماوەزی٢٧٢٢ک
٤ی دیسامبری٢٠٢٢ز