په‌یامی سه‌رۆكیPAKو فه‌رمانده‌ی گشتیی سپای میللیی كوردستان به‌ بۆنه‌ی 45هه‌مین ساڵی جیهادی خومه‌ینی دژی كورد و به‌ره‌نگاریی نه‌ته‌وه‌یی كوردستان

پێش 4 هەفتە

په‌یامی سه‌رۆكیPAKو فه‌رمانده‌ی گشتیی سپای میللیی كوردستان
به‌ بۆنه‌ی 45هه‌مین ساڵی جیهادی خومه‌ینی دژی كورد و به‌ره‌نگاریی نه‌ته‌وه‌یی كوردستان

   ٢٨ی گه‌لاوێژی ٢٧٢٤کوردیی، رێكه‌وتی ١٨ ئاگۆستی ٢٠٢٤ی زایینی، چل و پێنج ساڵ لە دەرچوونی حوکمی جیهادی خومەینی دژی كورد و هاوکات دەستپێکی بەرنگاریی نەتەوەیی رۆژهەڵاتی كوردستان بەرانبەر تاران، تێده‌په‌ڕێ.  
   ئه‌و میرات‌ و رێچكه‌ سیاسیی و له‌شكرییه‌ی له‌ په‌لاماردانی كوردستاندا له‌ ره‌زاشا و حكوومه‌تی پاشایه‌تییه‌وه بۆ خومه‌ینی و حكوومه‌تی كۆماریی گوێزرایه‌وه‌، دروستیی پێداگریی ئێمه‌ له‌ سه‌ر ئه‌و راستییه‌ كه‌ جێگۆڕكێی ده‌سه‌ڵات و سیسته‌می سیاسیی له‌  نێوان ده‌سته‌ و تاقمه‌ چه‌پ و راسته‌كانی نه‌ته‌وه‌ی حاكمدا بە بێ هەڵوەشانەوەی بناغە کۆڵۆنیالیستییەکانی دەوڵەتی ئێران، پرسی كوردستان چاره‌سه‌ر ناكات و مافی زه‌وتكراوی بۆ ناگه‌ڕێنێته‌وه‌؛ ده‌سه‌لمێنێت.  
  ئەمڕۆکە پاش ٤٥ ساڵ له‌و فه‌رمانه‌ و، له‌و شه‌ڕه‌ نابه‌رابه‌ره‌ی تاران دژی كورد هه‌ڵگیرساند، ناسیۆنالیزمی رزگارییده‌ری كوردستانی، لە قووڵایی کۆمەڵگای کوردستاندا لە سەدان خانە و بەستێنی جیاواز و فرەچەشندا، لە جووڵە و گەشەدایە و، هیوادارین لە گەڵ هەڵکەوتنی هەر دەرفەتێکی لە باری سیاسیی، به‌ یه‌كبوون و یه‌كگرتوویی نێوان رۆڵه‌كانی كوردستان له‌ ماكۆوه‌ هه‌تا لوڕستان و به‌ختیاریی، لە بزاڤێکه‌وه‌ بگاته‌ سه‌روه‌ریی نه‌ته‌وه‌یی.
پارتی ئازادیی کوردستان وەک له‌مپه‌ڕی لێبڕاوی فارسیفیكاسیۆن و ئێرانیبوون لە کوردستان، لەم بۆنەیەدا جارێکی دیکە لە سەر ئەو راستییە پێدادەگرێتەوە کە بێدەوڵەتیی ، هۆکاری سەرەکیی هەموو ئەو غەدر و کارەساتانەیە کە بە سەر نەتەوەکەمان هاتوون.هه‌ر بۆیه له‌ سه‌ر‌ ستراتیژیی هەڵوەشانەوەی دەوڵەتی کڵۆنیالیستی ئێران و هه‌ڵگرتنی ته‌وقی سه‌روه‌ریی له‌ سه‌ر كوردستان و گه‌یشتن به‌ سه‌روه‌ریی و ده‌وڵه‌ت و سه‌ربه‌خۆیی، وه‌ك تاكه‌ ده‌سته‌به‌ری كۆتاییهێنان به كوشتار و تێرۆر و تاڵانی کوردستان و ماڵوێرانكردنی كورد ، پێداده‌گرێ.

حسەین یەزدانپەنا
٢٨ی گه‌لاوێژی ٢٧٢٤ک
١٨ی ئاگۆستی ٢٠٢٤ز