په‌یامی سه‌رۆكیPAK به‌ بۆنه‌ی 46هه‌مین ساڵی جیهادی خومه‌ینی دژی كوردستان و به‌ره‌نگاریی نه‌ته‌وه‌یی كوردستان

4 رۆژ پێش ئێستا

46ساڵەی فەرمانی جیهاد دژی کوردستان.
دەرهاویشتەی کارکردی ستراکچێریی لە شاوە بۆ ئیمام!

     28ی گه‌لاوێژی 2725ی کوردیی، رێكه‌وتی 19 ئاگۆستی 2025ی زایینی، چل و شەش ساڵ لە فەرمانی جیهادی خومەینی دژی کوردستان تێپەڕ دەبێ.  
   ئەو فەرمان و لەشکرکێشییە نە هەڵکەوت بوو نە دابڕاو لە ڕابردوو. بەڵکوو ڕاست بۆ بنیاتەکانی دەوڵەت-نەتەوەی فارس دەگەڕایەوە. رێچکەیەکی کارکردیی ستراکچێریی‌ بوو کە ئەنجامدانی له‌ شاوە بۆ ئیمام گوێزرابووەوە. ئەوەش ئه‌و راستییه دەسەلمێنێ‌ كه‌ جێگۆڕكێی ده‌سه‌ڵات و سیسته‌می سیاسیی له‌  نێوان ده‌سته‌ و تاقمه‌ چه‌پ و راسته‌كانی نه‌ته‌وه‌ی سەردەست بە بێ هەڵوەشانەوەی بناغە کۆڵۆنیالیستییەکانی دەوڵەتی ئێران، نەک هەر پرسی كوردستان چاره‌سه‌ر ناكات، بەڵکوو  ئاسایشی مرۆڤی و ناسنامەییشی بۆ دەستەبەر ناکات.ئەم ڕاستییەش تەنیا گێڕانەوەیەکی مێژوو نییە، بەڵکوو تێگەیشتن و ئەزموونێکە بۆ حاڵ و داهاتوو. مادام بنەما و ڕەگەزەکانی دەوڵەتی فارس نەگۆڕدرێن، کورد و بەلووچ و عەرەب و ئازەری و تورکمەن وەک نەتەوە نەبیندرێن و دان بە مافی خۆبڕیاردانیان دا نەنرێت و بە قەوم و ئیتنیک و عەشیرەت بژمێردرێن؛ گۆڕانی رێژیم و گوێزانەوەی حوکم بۆ ڕەزا پەهلەوی یان میر حوسێن مووسەوی، شۆرای گوزار یان موجاهیدین،ناتوانێ ئازادیی و ماف و ئاسایش بۆ کورد و نەتەوەکانی دیکە دابین و دەستەبەر بکات.لە باشترین حاڵەت دا تەنیا دەتوانێ ڕیسکێکی سیاسیی بێت.
   ڕێبەری شەهید و پۆلێکی دیار لە سەرکردەکانیPAK لە هەڕەتی تازەلاوییانەوە لەوانە بوون کە لە گەڵ یەکەم چەخماخەکانی بەرەنگاریی کوردستان دا، چاکی مەردایەتییان بەلادا کرد و لەخۆبوردووانە دەوریان گێڕا. دواتریش کە پارتی ئازادیی کوردستانیان دامەزراند،PAK نەک هەر شانازیی بەشداریی چالاکانەی چەکداریی و کردەیی لە پڕۆسەی بەرەنگاریی دا تۆمار کردووە بەڵکوو شانازیی پێداچوونەوەی ڕەخنەگرانە بە مێژوو نووسیی و چەمک و تێڕمەکان و داهێنانی دییسکۆرس و پڕۆژە و ئایدۆلۆژیای کوردستانیی هەیە.پارتی ئازادیی کوردستان لەو پڕۆسەیەدا، قەوارەیەکی سەربار نەبووە کە لە پاش یان تەنیا لە ئاست دروشم و داخوازی گشتیی خەڵکەوە بێت و داهاتووی کوردستان بە قەزا و قەدەر بسپێرێت و دوایەش خۆی بکاتە خاوەنی سەرکەوتنی خەڵک و زەحمەت و داهێنانی ئەوانیتر. بە پێچەوانەوە هێندێکجار ڕاست پێچەوانەی تێگەیشتنی گشتیی و دروشم و گوتاری باو و  زاڵ بووە.پارتی ئازادیی کوردستان لەم پڕۆسەیەدا هەرگیز لە قەیرانی ڕۆڵ دا نەژیاوە.بەڵکوو ڕۆڵی پێشڕەوانەی گێڕاوە.PAK فکر و سیاسەت و گوتار و ئایدۆلۆژیای بەرهەمهێناوە و بۆ کۆمەڵگای گوێزاوەتەوە.PAK دەوری گێڕاوە لە تووڕدانی ناسنامەی ساختە و داسەپاوی ئێرانیی و گەڕاندنەوەی ناسنامەی کوردستانی و ڕزگار کردنی زەینی مرۆڤی کورد لە داگیرکراویی.PAK داهاتووی کوردستان بە لێڵی بۆ نەوە یان نەوەکانی داهاتوو بەجێ ناهێڵێ؛ بەڵکوو بە داهاتوو بینییەوە بنیاتەکانی بەختەوەرییان لە ئێستادا بۆ دادەڕێژێ و لە هەڕەشەکان وریایان دەکاتەوە. خوێن و عارەقە و بیری سیاسییPAK بووەتە هەوێنی دەستپێکی دەرچوونی خوشک و برایانی لوڕ و بەختیارییمان لە قەیرانی ناسنامە و گەڕانەوە بۆ  تۆرمە و تەبار و ڕەسانایەتیی خۆیان.ئەوەی کە ئێستا لە شەقامەکانی ڕۆژهەڵاتی داگیرکراودا دروشمی پێکهاتە شکێنانەی «داگیرکەری ئێرانی، قاتڵی ژینامانی» و «ژین و ژینگەی کوردستان سووتاوی دەستی ئێران» و «هەتا دەوڵەتمان نەبێ هەر ئەوە بەشمان دەبێ»، بەرز بووەتەوە، بەرهەمی   بیری سیاسی و تێکۆشانی بێوچان و پشوودرێژانەیPAK و دواتر پۆلێک کەسایەتیی سەربەخۆی سەربەخۆییخوازە.
  هیوادارم هەوراز و نشێو و کەوتن و سەرکەوتنەکانی ئەم 46 ساڵە وانەی بە نرخ بن بۆ تاک و کۆمەڵگا و ڕێکخراوە مەدەنییەکان و پارتە سیاسییەکانی کوردستان کە تاقیکراوەکان تاقی نەکرێنەوە و کوێڕەڕێیەکان نەگیرێنەبەر و خەم و خەون و پلانی هەمووان دەرهێنانی کوردستان لە گەرووی هەژدیها و سەربەخۆ و بەدەوڵەتکردنی بێت. تەنیا ئەوە بارتەقای خوێن و بەرەنگاری و خەباتی یەک سەدەی ڕابردووی ڕۆژهەڵاتی کوردستان و لە ناوییدا 46 ساڵەی جیهادی داگییرکەر و بەرەنگاریی کوردستانە!
 
حسەین یەزدانپەنا
28ی گه‌لاوێژی 2725ک
19ی ئاگۆستی 2025ز