دار و دەوەنی نیشتمان و جەستەی لاوەکانی،لە ئاگری داگیرکەردا (ڕاگەیەندراویPAKبە بۆنەی گیانبەختکردنی٣لاوی نیشتمان)

3 رۆژ پێش ئێستا

 دار و دەوەنی نیشتمان و جەستەی لاوەکانی،لە ئاگری داگیرکەردا
(ڕاگەیەندراویPAKبە بۆنەی گیانبەختکردنی٣لاوی نیشتمان)

دوای شەهیدبوونی حەمید مورادی، ئێوارەی دوێنێ یەکشەممە، چیاکۆ یوسفی‌نژاد و ئەمڕۆ دووشەممە ٦ی گەلاوێژ، خەبات ئەمینی کە لە ٢ی گەلاوێژدا لە کاتی گیانبازیی بۆ کوژاندنەوەی ئەو ئاورەی داگیرکەر لە کێوی ئاویەری بەردابوو بریندارببوون؛ بەهۆی سەختیی برینەکەیانەوە گیانیان بەخت کرد و چوونە ریزی شەهیدانی پاراستنی نیشتمانەوە.
ژینگە و سروشتی کوردستان لە سەت ساڵی رابردوودا لەبەر هێرش و پەلامار و پیلانگێڕییە جۆراوجۆرەکانی ئێرانی داگیرکەردا بووە .
.رۆڵەکانی کوردستان بە تێگەشتن لە دۆخی داگیرکراویی کوردستان و  پرسی سەرەکیی کورد و کوردستان و ناسینی جۆری پێوەندیی نێوان تاران و کوردستان وەک داگیرکەر و داگیرکراو؛ رۆڵی گرنگ و بەرچاو دەگێڕن لە پاراستنی ژینگەی بەرپەلامارکەوتووی کوردستان لەلایان ئێرانەوە.
شەهیدبوونی حەمید مورادی، چیاکۆ یوسفی نژاد و خەبات ئەمینی و سەرجەم شەهیدانی پاراستنی سروشت و ژینگەی کوردستان لەگەڵ ئەوەی برینێکی بەسۆیە بە جەستەی نیشتمانەوە ؛ هاوکات هێمای قوربانی‌دان، بەرخۆدان و ملنەدانی کوردە بە ژێردەستەیی و راسان و وێستانەوەیە لە بەرانبەر  سیاسەتەکانی ئەو دەوڵەتە داگیرکەرە .
پارتی ئازادیی کوردستان وێڕای بەداخ بوون و سەرەخۆشیی لە بنەماڵەی شەهیدانی تازەی پاراستنی سروشتی کوردستان، لەسەر ئەو راستییە پێدادەگرێتەوە کە سروشت و ژیان و ئاسایش و کەرامەت و مافەکانی کورد و کوردستان تەنیا لە کوردستانێکی ئازاد و سەربەخۆدا دەتوانێ پارێزراو بێت.
لە پێناو ھاوخەمیی لە گەڵ بنەماڵەی شەھیدەکان و ھەڵگرتنی بە کۆمەڵ و گشتیی ئەو خەمە و پێشاندانی یەکڕیزی و یەکێتیی نەتەوەیی، داوا لە دانیشووانی سنەی کۆڵنەدان و بەرەنگاریی دەکەین، بەیانی٧ی گەلاوێژ مانگرتنی گشتیی بەڕێوە ببەن. دڵنیاین کوردەواریی و شارەکانی دیکەی نیشتمان، سنە بەتەنیا ناھێڵن و ئەوکۆستەی لە گەڵ ھەڵدەگرن.

رۆحی شەهیدانی رێگای رزگاریی و پاراستنی کورد و کوردستان و ژینگەکەی شاد و هەرمان.

پارتی ئازادیی کوردستان PAK
٦ی گەلاوێژی ٢٧٢٥ ک
٢٨ی ژوولای ٢٠٢٥ ز