راگەیەندراوی رێکخراوی ئازادیی ژنانی کوردستان-نینا بە بۆنەی ساڵوەگەڕی فەرمانی جیهادی خومەینی دژی نەتەوەی کورد

پێش 3 هەفتە

راگەیەندراوی رێکخراوی ئازادیی ژنانی کوردستان-نینا بە بۆنەی ساڵوەگەڕی فەرمانی جیهادی خومەینی دژی نەتەوەی کورد

ئەمڕۆ ٢٨ گەلاوێژ ٤٦ ساڵ لە فەرمانی قەتڵ و عامی خومەینی جەنایەتکار دژی نەتەوەکەمان لە رۆژهەڵاتی کوردستان تێپەڕ دەبێت. فەرمانێک کە بوو بە دەسپێکی کوشتار و ڕەشەکوژی و قەتل و عامی بێبەزەییانەی رۆلەکانی نەتەوەکەمان لە رۆژهەڵاتی کوردستان. فەرمانی خومەینی بۆ جینوساید و تەفرووتوناکردنی رۆڵەکانی کورد فەرمانێکی ئاسایی و کاتی یان لە پڕ و هەڵقوڵاوی دۆخێکی تایبەتی نەبوو، بەڵکوو لە درێژە و ئاکامی سیاسەتی مێژوویی دەوڵەت-نەتەوەی داگیرکەری فارس و پێکهاتەی کۆلونیالیستی ئەو پێکهاتە سیاسییە بوو لە پێناو سڕینەوە و یەکدەستکردنی دەوڵەت نەتەوەی فارس. پێکهاتەیەک کە بە درێژایی سەد ساڵ نە بە ئاڵووگۆڕی دەسەڵات و جێگوڕکێی نێوان مۆرەکان و نە بە رووخانی حکوومەتەکان گۆرانکاری بنەڕەتی تێدا پێکهات. 
مێژووی سەد ساڵی رابردوو شاهیدی ئەو راستییەن کە نە رێفورمخواز، نە دەستاودەستکەرانی دەسەڵاتی نێوان شا و شێخ و تەنانەت ئۆپوزیسیۆنی پووچ و بێمایەی ئەو نیزامە داگیرکەرە نایانەوێت بۆ یەک چرکەش دان بە مافی کورد وەک نەتەوە و نیشتیمانەکەی وەک جوغرافیایەکی سیاسی بنێن.

ئەوەی جێی شانازییەی و بووەتە دەسکەوتێکی مێژوویی و مانادار بۆ رۆڵەکانی نەتەوەکەمان ئەوەیە کە چ لە کاتی بڕیارە شوومەکەی خومەینی کە بوو بە هۆی کووژران و قەتڵ و عامی هەزاران رۆڵەی بێتاوانی کورد، رۆڵەکانی نەتەوەکەمان، کچان و کۆڕانی ئەم نیشتیمانە نە لەو کاتەدا و نە دواتر هەرگیز بەرانبەر دەسدرێژی و زوڵم و زۆر و جینایەتەکانی دەوڵەتی داگیرکەری ئێران بێدەنگ نەبوون و بۆ چرکەیەک لە بەرەنگاربوونەوە و ئاوقابوونی داگیرکەر نەسڵمینەتەوە.

لەم رێگا پڕ لە هەوراز و نشێوە و هاوکات پڕ لە شانازییەدا ژنانی کورد شان بە شانی پیاوان رۆڵی مێژوەییان گێڕاوە.
ژنانی کورد لە ریزەکانی پێشمەرگەدا دەستیان دایە چەک و لە گۆڕەپانەکانی بەرگری لە نیشتیماندا هەتا ئێستاش لە ریزی پێشەوەی ئەو خەباتەدان. لە مەیدانی بەرگری و خەباتی ناخۆداشدا ئاهەڵگر و پێشەنگی خەباتی سیاسیی و مەدەنی بوون و لەو پێناوەدا زۆرترین قوربانیان پێشکەشی کورد و نیشتیمانەکەی کردووە.

لە ٤٦ەمین ساڵوەگەڕی فەرمانی جینایەتکارانەی خومەینی دژی نەتەوەکەمان لە رۆژهەڵاتی کوردستان، رێکخراوی ئازادیی ژنانی کوردستان-نینا جارێکیتر پێ لەسەر ئەو راستییە دادەگرێتەوە کە  ئازادیی ژنانی کورد هەرگیز لە ئازادیی و رزگاریی نەتەوەی کورد جیا ناکرێتەوە و مێژوو ئەوەی سەلماندووە کە هیچ نەتەوەیەک ئازاد نابێ ئەگەر ژنانی ئازادی نەبێت و هیچ ژنێکیش بە بێ رزگاریی نەتەوەکەی لە ژێردەستی و ئیستیعمار دەستی بە ئازادیی راستەقینە راناگات.
رێکخراوی ئازادیی ژنانی کوردستان-نینا، وێرای دانەواندنی سەری رێز و ئەمەک بۆ شەهیدانی رێگای رزگاری و سەربەخۆیی کوردستان، دووپاتی دەکاتەوە کە لەگەڵ خەبات لە پێناو هێنانەدی مافەکانی ژناندا، تا وەدیهاتنی دەوڵەت و سەربەخۆیی کوردستان، هاوشان لەگەڵ رۆڵەکانی نەتەوەکەمان درێژە بە خەباتی رەوای خۆی دەدات.

رێکخراوی ئازادیی ژنانی کوردستان-نینا
18ئ ئووتی 2025
28ی گەلاوێژی 2725