کوردستان بەردەوامە لە ململانێ بۆ سەروەریی نەتەوەیی راگەیەندراوی پارتی ئازادیی کوردستان بەبۆنەی سەرکەوتنێکی دیکەی کوردستان بەسەر تاران دا

پێش 3 هەفتە

کوردستان بەردەوامە لە ململانێ بۆ سەروەریی نەتەوەیی
راگەیەندراوی پارتی ئازادیی کوردستان بەبۆنەی سەرکەوتنێکی دیکەی کوردستان بەسەر تاران دا

ئەمڕۆ کوردستان دیسان ناسنامەی جیاواز و ئامانج و خولیای خۆی بە گوێی جیهان دا دایەوە و ململانێی خۆی لە سەر سەروەریی لە گەڵ تاران، پێشان دایەوە.
 ئەمرۆ لە دووهەمین ساڵڕۆژی قەتڵی دەوڵەتیی ژینا و راپەڕینە مەزنەکەدا ؛ رۆڵەکانی نیشتمان بەدەم بانگەوازی پارتی ئازادیی کوردستان و پارتەسیاسییەکانی دیکە و تێکۆشەران و ڕێکخراوەکانی ناوەوە و دەرەوەی رۆژهەڵاتی کوردستانەوە هاتن و بە مانگرتن  لە شارەکانی سنە، سەقز، ئابدانان، مەریوان، دیواندەرە، بۆکان، پیرانشار، شنۆ، مەهاباد، کرماشان و ئیلام ؛  بەرانبەر ڕەقیب، سروودی درێژەدانی رێگای شەهیدانی ئازادیی و مانەوە و کۆڵنەدان و نەسرەوتن تا سەرکەوتنیان چرییەوە.
ڕۆڵەکانی کوردستان لە کاتێکدا ئەم ململانێ و هەڵوێستەیان تۆمار کرد کە هێشتا خوێنی لاوانی ڕاپەڕیوی نیشتمان بە شەقامەکانەوە ماوە و زیندانەکانی داگیرکەر لە خەباتگێڕانی ڕێگای سەربەخۆیی ئاخنراوە و شەقام و گۆڕەپانەکانی شارەکان بە هێزی چەکداری داگیرکەر تەنراون.
    قوڕ بەسەرتان سەرانی دەوڵەتی داگیرکەر کە ٤٥ ساڵ نا، ١٠٠ ساڵە سەبارەت بە شکستی پڕۆژەکانتان و بەفیڕۆ چوونی خوێن و خەرجەکانتان، بە دەست کۆڵنەدانی کوردستانەوە دۆش داماون و هەر ساڵ خۆزگە بە پار دەخوازن.
ئێرە کوردستانە، نیشتمانی بەزێنەری پیلانی ئاسمیلاسیۆن و بە ئێرانیی کردن و ڕاپەڕینە مەزنەکان. خاکێک کە نەتەوەیەکی وەها کۆڵنەدەری لە سەر بژی، سەرەنجام هەر دەبێ کۆتایی بە سەروەریی بێگانەی داگیرکەر بێنێ و بە دەوڵەت و سەربەخۆیی  و سەروەریی نەتەوەیی بگا.
  
پارتی ئازادیی کوردستان PAK

٢٥ی خەرمانانی ٢٧٢٤ کوردی
١٥ سێپتامبری ٢٠٢٤زایینی