هەرێمی کوردستان لە نێوان شەرعییەت و متمانەی دەرەکیی و ناوخۆیی‌دا (بەشی یەکەم)

5 رۆژ پێش ئێستا

هەرێمی کوردستان لە نێوان شەرعییەت و متمانەی دەرەکیی و ناوخۆیی‌دا
(بەشی یەکەم)

هەرێمی کوردستان لە دامەزراندنیەوە تا ئێستا چەند هەڕەشەی گەورەی دەرەکیی تێپەڕاندووە کە دەکرێ لەم قۆناغانەدا پۆلێن بکرێن:
-هەڕەشە و لەشکرکێشییەکانی ترکیا بۆ داگیرکردن(ساڵانی ١٩٩١-٢٠٠٠).
-هەڕەشە لەشکرییەکانی ئێران و نوێڵدانی شەڕی ناوخۆ و حەولەکانی دابەشکردنی بەچەند ناوچەی نفوز و هەڵوەشاندنەوەی قەوارەکە(١٩٩١-٢٠٠٠).
-ھێرشی داعش و حەولی گرتنی ھەولێر(٢٠١٤-٢٠١٧).
-ھێرشی ھاوبەشی سپاکانی ئێران و عێراق بۆ داگیرکردنی هەولێر و کۆتاییهێنان بە هەرێمی کوردستان(٢٠١٧).
-هەڕەشەکانی بەغداو تاران بۆ خنکاندنی هەرێمی کوردستان و رێککەوتنی ئاسایشی و ھێرشە ھاژەکیی و درۆنییەکان(٢٠٢٣).
  وەك دەبینرێ خاڵی ھاوبەشی هەموو ئەو هەڕەشانە، دەرەکیی، وجوودیی و رەق و لەشکریی بوون. بێجگەلەوانە دەیان هەڕەشەی دیکەش هەن کە سەرچاوەی دەرەکییان هەیە و دەکرێ لە چوارچێوەی دژە«ئاسایشی کراوە» دا، بخوێندرێنەوە.*
   هەرێمی کوردستان بەرگەی هەموو ئەو هەڕەشانەی گرت و بە سەلامەت لێیان دەرچووە. ئیستا ھەرێم ئەگەرچی ئەکتەری نا-دەوڵەتییە، بەڵام لە پێوەندییە نێودەوڵەتییەکاندا حیسابی دەوڵەتی بۆ دەکرێ و دەوری دەوڵەت دەگێڕێ.
  لەم بەرگەگرتن و ھەستانەوەیەدا، هەبوون و بەردەوامیی شەرعییەت و متمانەی دەرەکیی بە هەرێمی کوردستان، فاکتەری گرینگ و بڕێک جاریش چارەنووسساز بوونە. ئێستا بە چاوخشانێکی خێرا بەسەر جووڵە دیپلۆماسییەکانی سەرکردایەتیی و کاربەدەستانی ھەرێم دا، بەڕوونی دیارە کە هەرێمی کوردستان پاش تێپەڕاندنی دوا هەڕەشە دەرەکییەکانی سەری، چلۆن لە هەستانەوە و پێگەی ھێزدایە:سەرۆک بارزانی ڕۆژانە چاوی بە کاربەدەستان و شاندی دەوڵەتان دەکەوێ؛ ھەنووکە بەڕێزان نێچیروان بارزانی لە ئێران، مەسروور بارزانی لە ئەمریکا و قوباد تاڵەبانی لە کۆڕبەندی دێڵفی/ن.
ئێستا کاتی ئەوە ھاتووە لە ئاستی نێوخۆییدا، جارێکی دیکە شەرعییەت و متمانەی سیاسیی بە سیستەمی سیاسیی و کاراکتێر و دامەزراوە و کۆی قەوارەکە و بەھا نیشتمانیی و نەتەوەییەکان بەرز بکرێتەوە.( ماویەتی).

حسەین یەزدانپەنا
٢٩ی گوڵانی ٢٧٢٥ک
١٩ی مای ٢٠٢٥ ز