پیرۆزبایی و پشتیوانیی پارتی ئازادیی کوردستانPAK لە کۆنفڕانسی "یەکڕیزی و یەکهەڵوێستیی کورد " لە ڕۆژاوای کوردستان

26/04/2025

پیرۆزبایی و پشتیوانیی پارتی ئازادیی کوردستانPAK
لە کۆنفڕانسی "یەکڕیزی و یەکهەڵوێستیی کورد " لە ڕۆژاوای کوردستان

ئەمڕۆ  شەممە ٦ی گوڵانی ۲۷۲٥ ک ، ۲٦ی ئاپریلی۲۰۲٥ ز،  کۆنفڕانسی " یەکڕیزی و یەکهەڵوێستیی کورد " لە قامیشلۆ  لەلایان  ڕێڤەبەری ڕۆژاوای کوردستان و پارتەکانی لەوانە  لایەنەکانی پەیەدە و" PYNK ، پارتەکانی  نێو" ئەنجومەنی نیشتمانی کورد لە سووریا"  ENKS"  و  بەشداریی و ئامادەبوونی بەڕێزان  ژەنەڕاڵ مەزلوم عەبدی  فەرماندەی گشتیی هێزەکانی سوریای دیموکرات و  نوێنەری  سەرۆک مەسعود بارزانی و  ژمارەیەک  لە پارت  و لایەنە سیاسییەکانی پارچەکانی دیکەی کوردستان دەستیپێکرد.
پارتی ئازادیی کوردستانPAK، پیرۆزبایی گەرمی گشت ڕیزەکانی و پشتیوانیی خۆی لەم  کۆنفڕانسە دەردەبڕێ و  بە ھەنگاوێکی گرینگ، مێژوویی و دەسکەوتێکی مەزن بۆ کورد و ڕۆژاوای کوردستان دەزانێ. 
پارتی ئازادیی کوردستان، وێڕای دەستخۆشی و قەدرزانی لە هەموو ئەوانەی بۆ بەڕێوەچوونی کۆنفڕانس و یەکڕیزیی کورد لەڕۆژاوای کورستان  دەوریان گێڕاوە، ئاواتەخواز و هیوادارە ڕێککەوتن و یەکڕیزی و یەکهەڵوێستیی ڕۆژاوای کوردستان ببێتە هاندەری هەموو  پارتە سیاسییەکان و  یەکێتی و تەبایی هەموو پارچەکانی کوردستان بگرێتەوە؛ و هاندەربێ بۆ ڕۆژهەڵاتی کوردستان و پارتە سیاسییەکانی بۆ لێک نزیکبوونەوە و پێکھێنانی بەرەیەکی یەکگرتووی کوردستانی لەسەر بنەمای وەدەسھێنانی مافی دیارییکردنی چارەنووس.
یەکگرتن و یەکێتیی نەتەوەیی نێوان پارت و لایەنە سیاسییەکانی کوردستان ھێز و وزەی گەورەی کورد ئازاد دەکا و پیلانگێڕی و گەلەکۆمەی داگیرکەران، تێکدەشکێنێ.

خەلیل نادری
وتەبێژی پارتی ئازادیی کوردستان PAK
٦ی گوڵانی ۲۷۲٥ کوردی
۲٦ ئاپریلی ۲۰۲٥ زاینیی