ڕاگەیەندراوی پارتی ئازادیی کوردستانPAK سەبارەت بە ڕاگوێزانی زۆرەملیی دانیشتوانی کەمپەکانی لایەنەکانی کۆمەڵە

پێش 2 هەفتە

ڕاگەیەندراوی پارتی ئازادیی کوردستانPAK
سەبارەت بە ڕاگوێزانی زۆرەملیی دانیشتوانی کەمپەکانی لایەنەکانی کۆمەڵە

   پێشنیوەڕۆی ئەمڕۆ کاربەدەستانی ئیدارەی سلێمانی،هەرسێ لایەنی کۆمەڵەیان ناچار کرد مل بە بڕیاری چۆڵکردنی کەمپە لە مێژینەکانیان بدەن و ڕاگوێزانی زۆرە ملیی پێشمەرگە و ماڵ و خێزانەکانی دانیشتووی ئەو کەمپانەیان بەسەردا سەپاندن. ئەو ڕووداوە وەبیرهێنەرەوەی پەلامارەکانی نوامبر و دیسامبری ساڵی ١٩٩٦ی سەر بنکە و بارەگاکانی پارتی ئازادیی کوردستان و داگیرکردن و بارکردن و دەرکردنی خاو و خێزانەکانمانە.
چۆڵکردنی ئەو کەمپانە و تەرحیلی دانیشتوانەکانیان بەشێکن لە پیلانگێڕییەکانی تاران دژی بزاڤی ڕزگاریخوازیی ڕۆژهەڵاتی کوردستان و بنکۆڵ کردنی سەنگ و پێگەی هەرێمی کوردستان لە لای ڕۆژهەڵاتییەکان و لێکدابڕانی ڕۆحیی نەتەوەیی کوردستانیی کە بەغدا بەرفەرمانیی بۆ کردووە و ئیدارەی سلێمانی جێبەجێی دەکات.
پارتی ئازادیی کوردستان بە باشیی لە دۆخی هەرێمی کوردستان لە ژێر گوشارەکانی تاران و بەغدا و قەیرانخوڵقێنییەکانیان بۆی، تێدەگا و هەڵوێستی پارتە سیاسییەکانی ڕۆژهەڵاتی کوردستان بۆ ڕەچاو کردنی ئەو دۆخە بە بەرپرسانە دادەنێ، بەڵام هەرگیز نەدەبوو ئاستی چوونە بن باری پیلانگێڕی و گوشارەکانی تاران و بەغدا بگاتە ڕادەیەک کە ئیدارەی سلێمانی دەست بۆ ڕاگوێزانی زۆرە ملیی ماڵ و حاڵی پێشمەرگە و خاو وخێزانەکانیان ببات و برینێکی وەها لە سەر دڵی ڕۆڵەکانی ڕۆژهەڵاتی کوردستان بکات و ئەو پەڵە مێژووییەش بۆ خۆی تۆمار بکات.
  پارتی ئازادیی کوردستان وێڕای مەحکووم کردنی ئەو کردەوەیە، داوا لە ئیدارەی سلێمانی و سەرۆک و سەرکردایەتیی یەکێتی نیشتمانیی کوردستان دەکا ئەو ڕاگوێزانە ڕابگیرێت و هەر جۆرە گوشارێکی دیکە بۆ سەر پارتە سیاسییەکانی ڕۆژهەڵاتی کوردستان و پێشمەرگە و خاو و خێزانەکانیان بەربەست بکرێت.

پارتی ئازادیی کوردستانPAK

١٥ی خەرمانانی ٢٧٢٤ک
٥ی سێپتامبری ٢٠٢٤ز