بەیاننامەی PAK بە بۆنەی دووهەمین ساڵوەگەڕیی راپەڕینی ژینا

10/09/2024

بەیاننامەی PAK بە بۆنەی دووهەمین ساڵوەگەڕیی راپەڕینی ژینا
(کوردستان لە ٢٥ی خەرمانان دا، پەیامی کۆڵنەدان و بەردەوامیی دەدا بەڕووی جیھان دا)

کوردستانیانی ڕاهاتوو بە خەبات و کۆڵنەدان!
کوردستانیانی خوڵقێنەری ڕاپەڕینی ژینا!

  بەرەبەرە لە دووهەمین ساڵوەگەڕی ئەو تاوانە نزیک دەبینەوە کە کاربەدەستانی دەوڵەتی داگیرکەری فارس ڕۆژی ٢٥ی خەرمانان لە تارانی پێتەختی تاوان و تاڵان بە کوشتنی کیژە لاوی کورد ژینا ئەمینی خوڵقاندیان. هاوکات ٢٦ی خەرمانان دووهەمین ساڵهاتی چەخماخەی ئەو راپەڕینە مێژووییە بەڕێوەیە کە لە رۆژی ناشتنی ژینا دا لە سەقزەوە لێدرا و هەموو نیشتمانی داگیرکراوی گرتەوە و بڵێسەکانی گەیشتە لای نەتەوەکانی دیکەی جوغرافیای ئێران.
    راپەڕینی ژینا ئاڵقەیەکی دیکە لە زنجیرەی ڕاپەڕینەکانی کوردستان بوو لە پێناو رزگاریی لە تەوقی سەروەریی دەوڵەتی ئێران کە قەڵای چاریە و دمدمی بە بنارەکانی داڵاهۆ و سنبران و  دێنا و زەردکێوی لوڕستانات و بەختیاریی بەستەوە. ڕاپەڕینی ژینا ئەگەر چی بە کۆمەڵێک هۆکاری ناوخۆیی و دەرەکیی نەگەیشتە ئامانج، بەڵام نەک هەر سیستەمی سیاسیی کۆماری ئیسلامیی لە گەڵ گەورەترین قەیرانی مێژوویی بەرەوڕوو کرد، بەڵکوو بناغەکانی دەوڵەتی کۆڵۆنیالیستیی ئێرانی هێنایە لەرزین.
  ئێستا کە لە بەرەبەری دووهەمین ساڵوەگەری ئەو تاوانە دەوڵەتییە و ئەو ڕاپەڕینە نەتەوەییەی کوردستانداین، دەبا ڕۆڵەکانی نیشتمانی داگیرکراومان چاکی مەردایەتیی بە لادا بکەن و ڕۆژی ٢٥ی خەرمانان لە هەر کوێ بۆیان دەلوێ بە مانگرتنی گشتیی و چوونە سەر مەزاری ژینا و شەهیدەکانی دیکەی ڕاپەرین و سەردانی بنەماڵەی شەهیدان و ھەڵکردنی ئالای کوردستان و داگرتنی ئاڵای داگیرکەر، جارێکی دیکە ڕۆحی ڕاپەڕین دەمەزەرد بکەنەوە و بەردەوامیی کوردستانی کۆڵنەدەر لە خەبات لە پێناو ڕاماڵینی داگیرکەران لە کوردستان و گەیشتن بە سەروەریی و سەربەخۆیی نەتەوەیی و هەڵتەکاندنی بناغەکانی دەوڵەت نەتەوەی کڵۆنیالیستیی ئێران پیشان بدەنەوە. هەروەها یاد و ناوی ئەو ڕۆڵە جوامێرانەی بە خوێنی خۆیان  ئیرادەی هەڵگرتنی تەوقی سەروەریی ئێران لە سەر کوردستانیان دەربڕی، بەرز ڕابگرن.
  


پارتی ئازادیی کوردستانPAK

٢٠ی خەرمانانی ٢٧٢٤ ک
 ١٠ی سێپتامبری ٢٠٢٤ز