ئێران؛ دەوڵەتێکی سەرکز و زەلیل لەحاست ئیسراییل؛ بە گەڤ لە حاند کوردستانی بێ دەوڵەت!

پێش 4 هەفتە

ئەدیب خالدیان

مێژووی ئێران پڕاوپڕە لە دۆڕان، سەرکزکردن و داماویی لە شەڕ و ململانێیە نێودەوڵەتییەکان. تاکە شەڕێکیش نییە ئێران بەشداریی تێداکردبێ و سەرکەوتوو تیایدا هاتبێتە دەرێ؛ شەڕی یەکەم و دووهەمی جیهانی و شەڕی عێراق × ئێران بۆ نموونە.
ئێران بۆجارێکیش ناوێری زاتی ئەوە بکا لەگەڵ ئەو دوژمنانەی ساڵانێکە خۆی بۆ خۆی داتاشیون و هووتافی سڕینەوەیان لەسەر نەخشەی جیهان دەکێشێ بڕواتە شەڕەوە و تەنانەت ناتوانێ لە مانۆڕێکی بچووکیش‌دا بێت رووبەڕوویان ببێتەوە. ئەمەش ریشەی لە فەرهەنگی مل‌کزی و دۆڕاویی ئەو دەوڵەتە داگیرکەرەدایە.
تارانی پێتەختی پشیلە، ئەو دەوڵەتەی کە پەیتا پەیتا سەردار و فەرماندە و گەورە لەشکریی و تێرۆریستەکانی لەلایان ئامریکا و ئیسراییلەوە دەکوژرێن و متەقی لێوەنایە؛ کەچی بە بیانووی پێکان و لێدان لەو دەوڵەتانە خۆی لێ دەبێتە شێر و پەلاماری کوردستانی بێ‌دەوڵەت دەدا و ژن و منداڵ و سڤیلی کورد دەکاتە نیشانە و تۆڵەی خۆی ئاوا زەلیلانە دەکاتەوە.

سەبارت بە هێرشەکانی دوێنێی ئیسراییل و کوژرانی ژمارەیەک فەرماندەی هێزی قودس و دیپلۆمات - تێرۆریستەکانی بەهەمان شێوە، هەمان سیاسەتی سەردانەواندن و مل‌کزکردن دەگرێتە بەر و جیا لە هاتوهاواری بێ کردار و بیانووگرتن بە کوردستان هیچی دیکەی پێ ناکرێ.

ئەدیب خالدیان