​ ڕاگەیەندراوی پارتی ئازادیی کوردستانPAK بەبۆنەی ڕمانی دەسەڵاتی بەشارئەسەد لە سووریا

پێش 1 هەفتە

ڕاگەیەندراوی پارتی ئازادیی کوردستانPAK
 بەبۆنەی ڕمانی دەسەڵاتی بەشارئەسەد لە سووریا 

   بەرەبەیانی ئەمڕۆ هێزە چەکدارە بەرهەڵستکارەکانی بەشار ئەسەد بە بێ هیچ بەرنگاربوونەوەیەکی هێزەکانی حکومەتی سووریا؛ دەروازەکانی دیمەشقی پایتەختی سووریایان کردەوە و کۆنترۆڵییان گرتەدەست.
بەمجۆرە دەسەڵات و حوکمڕانیی ٥٣ ساڵەی بنەماڵەی ئەسەد لە سووریا کۆتایی هات.
  هێشتا ڕوون نییە لە پشت پەردەوە چۆن و چ دەوڵەتیەلێ هەوساری ئەو گۆڕانکارییەیان بە دەستەوەیە.هەروەها ڕوون نییە داهاتووی سیاسیی سووریا، چۆن دیزاین کراوە و چۆن دەبێ. 
  ڕمانی دەسەڵاتی بەشار ئەسەد، تەنیا کۆتایی هێنانی حوکمڕانیی لە وڵاتێکی دیاری کراو نییە، بەڵکو گۆڕانێکی ژێئۆپۆلیتیکییە لە ناوچەکە. بەو ڕووداوە، هیلالی شێعە و مەحوەری مقاوەمەتی ئێرانی پەکی کەوت و لێکترازا. ئەم گۆڕانکارییە کاریگەریی ڕاستەوخۆ لە سەر پێگەی هەرێمی و ئاسایشی نەتەوەیی ئێران دادەنێ. 
ئەگەرچی کەوتنی هەر دیکتاتۆرێک بە شێوەیەکی گشتیی بۆ عەوداڵانی ڕێگای ئازادیی جێگەی دڵخۆشیی و هیوابەخشە، بەڵام لە جێدا بە مانای کۆتایی سیستەمی دیکتاتۆریی نییە.دیکتاتۆریی ئەسەد، خۆی بەرهەمی بنیاتی دەوڵەتێکی دەسکردی نامەشرووع بوو کە رێکەوتننامەی سایکس-پیکۆ و لۆزان بەرهەمیان هێنا بوو.
بۆیە بۆ نەمانی یەکجاریی دیکتاتۆریی و داگیرکەریی لە سووریا، پێویستە بناغەکانی ئەو دەوڵەت-نەتەوەیە کە لەسەر سڕینەوەی ناسنامەی کورد و ئەوانی دیکەی ناعەرەب و سەپاندنی یەک ناسنامە بەسەریاندا بنیات نراوە، هەڵوەشێتەوە.ئەوەش لە ئازادیی نەتەوەکانی ئەو دەوڵەتە بۆ دیاری کردنی مافی چارەنووسی سیاسییاندا، دەبینرێتەوە. دەست نەبردن بۆ بنەماکانی دەوڵەت و نۆژەنکردنەوەی، دیکتاتۆریی بەرهەم دێنێتەوە و دیکتاتۆر دەخوڵقێنێ.
  ئێستا کە کۆتایی بە دەسەڵاتی بەشار ئەسەد هاتووە، دوو خاڵی سەرەکیی لە ناوەندی سەرنجی پارتی ئازادیی کوردستان دایە کە بریتیین لە:
١- ئاخۆ داهاتوو و چارەنووسی ڕۆژاوای کوردستان چۆن دەبێ؟ ئایا سەرکردایەتی سیاسیی و سپایی ڕۆژاوای کوردستان بە ستراتیژیی ڕزگاریی نەتەوەیی و گەیشتن بە سەروەریی نەتەوەییەوە لە گۆڕەپانی سیاسی تازەی سووریادا یاری دەکەن یان بە تەمای دێموکراسیی سووری، بەشدار دەبن لە نۆژەنکردنەوەی دەوڵەت-نەتەوەی قەیرانگرتووی سووریا و چەقاندنەوەی سێدارەکەی دیمەشق بۆ ڕۆڵەکانی کوردستان؟
پارتی ئازادیی کوردستان لەو باوەڕەدایە کە بەمەرجی یەکێتی و یەکڕێزی هێزە سیاسییەکانی ڕۆژاوای کوردستان لە سەر بنەمای وەدەستهێنانی مافی دیاریی کردنی چارەنووس و هەماهەنگی و کەڵکوەرگرتن لە کاپاسیتییە سیاسی و دیپلۆماسییەکانی هەرێمی کوردستان و بە گەڕخستنی دیپلۆماسییەکی چالاک؛ ئەو دەرفەتە هەڵکەوتووە کە ڕۆژاوای نیشتمان تا ئاستی یەکەیەکی خاوەن سەروەریی گەشەبکات و پێگەیەکی ژێئۆپۆلیتێک و ژێئۆستراتێژیک دابین بکات.
٢- بزاڤی ڕزگاریخوازیی ڕۆژهەڵاتی کوردستان چۆن بتوانێ لەو شکستە ستراتیژی و دوکتورینییەی بەسەر ئێران هاتووە، کەڵک وەربگرێ و بە پێوەندیی و هاوکاریی لەگەڵ نەتەوەکانی دیکەی بندەستی ئێران، کۆتایی بە دەوڵەتی کۆلۆنیالیستی ئێران و حکوومەتی تێرۆر و تاوانی کۆماری ئیسلامیی بێنن. پارتی ئازادیی کوردستان لەم پێناوەدا جارێکی دیکە لەسەر پێویستیی پێکهێنانی بەرەیەکی یەکگرتووی کوردستانیی بۆ وەدیهێنانی مافی دیاریکردنی چارەنووس لە رێگای ڕێفراندۆمێکی گشتی و ئازادەوە پێدادەگرێتەوە.

پارتی ئازادیی کوردستانPAK

١٨ی سەرماوەزی٢٧٢٤ک
٨ی دیسامبری ٢٠٢٤ز