رۆڵەکانی رۆژهەڵاتی داگیرکراو لە بەرەنگاریی و پاراستنی ژینگەی کوردستاندا

4 کاتژمێر پێش ئێستا

رۆڵەکانی رۆژهەڵاتی داگیرکراو لە بەرەنگاریی و پاراستنی ژینگەی کوردستاندا

پیلانە سیستەماتیکەکانی ئێرانی داگیرکەر بۆ وێرانکردن و تێکدانی ژینگەی کوردستان، بەشێکی دانەبڕاون لە سیاسەتی کۆلۆنیالیستیی بەرانبەر بە کورد و نیشتمانەکەی.
تاران بە ئاگرتێبەردانی دار و دارستانەکان، بە وشک کردنی سەرچاوە ئاوییەکان و ھەڵبەستنی ھەڕەمەکیی بەنداوەکان، بە تۆنێل لێدان، بە تاڵانبردنی سەروەت و سامانی سەرزەوی و ژێرزەویی کوردستان، بە میلیتاریزەکردنی مەڵبەندەکانی نیشتمان و لەژێر ناوی پڕۆژە و بەرنامەی جۆراوجۆرەوە پەلاماری سروشت و ژینگەی کوردستان دەدا. ئەو سیاسەت و پەلامارە سیستەماتێکە ڕەھەندێکی دیکەی پەلاماردانی خاک و خەڵک و ناسنامە و مێژوو و بیرەوەریی کوردستانیانە.
 لە رۆژانی رابردوودا، لە ناوچەی "کانی سەنگ شکێن"ی بناری چیای ئاویەری سنە، بە تەلبەندکردنی ئەو ناوچانە و دەستکاریی کردنی سروشتەکەی،ھەنگاوێکی پەلاماردەرانەی داگیرکەر دژی کوردستان و کورد، ھەڵگیرایەوە.
بە خۆشیی و شانازییەوە، دوێنێ هەینی ژمارەیەک چالاک و ژینگەپارێزی شارەکە، لە ئاویەر کۆبوونەوە و لەبەرانبەر ئەم سیاسەت و پلانە دزێوانەی داگیرکەر راوەستان و ناڕەزایەتییان دەربڕی.
پارتی ئازادیی کوردستان وێڕای لەقاودانی ئەم پلانەی دەوڵەتی داگیرکەر، و پاڵپشتیی لە ھەڵوێستی ژینگە پارێزان؛ پێداگریی لەسەر ئەو راستییە دەکاتەوە کە پاراستنی سروشت و ژینگەی نیشتمان بەشێکی دانەبڕاوە لە نەبەردی بەرەنگار بوونەوەی داگیرکەران لە ھەموو پانتایی و بەستێنەکانی ژیان دا.

پارتی ئازادیی کوردستان PAK
کۆمیتەی راگەیاندن
٢١ی پووشپەڕی ٢٧٢٥ک
١٢ ی ژوولای ٢٠٢٥ ز