​ بانگەوازی پارتی ئازادیی کوردستان بۆ رێگرییکردن لە حوکمی لەسێدارەدانی پەخشان عەزیزی و وریشە مورادی " با رێ لە ئێعدامی کچەکانمان بگرین"

3 رۆژ پێش ئێستا

بانگەوازی پارتی ئازادیی کوردستان بۆ رێگرییکردن لە حوکمی لەسێدارەدانی پەخشان عەزیزی و وریشە مورادی
" با رێ لە ئێعدامی کچەکانمان بگرین"

دەوڵەتی داگیرکەری ئێران لەگەڕێکی دیکەی خوڵقاندنی تاوان دژی کورد، نیازی وایە پەخشان عەزیزی و وریشە مورادی لە سێدارە بدات.
سەپاندنی حوکمی ئێعدام و بەردەوامیی کوشتاری ڕۆڵەکانی کوردستان لە تەنیشت زمانکوژی، تاوانی ژێنۆساید و تێکدانی ژینگە و تاڵانکردنی سامانی نەتەوەیی و زەوتکردنی ئاسایشی گشتیی و تاکەکەسیی لە کوردستان، ئەو ڕێچکە کۆڵۆنیالیستییە فاشیستییەیە کە  دەوڵەتی فارس لە یەک سەدەی ڕابردوودا بە سیستەمەکانی پاشایەتیی و کۆماریی ئیسلامییەوە گرتوویەتە بەر.
  ھەموو ئەم تاوانانە دژی کوردستان بە دەسەڵات و دارایی دەوڵەتێکەوە دەکرێ کە بناغەکەی بە پێی بەرژەوەندیی و بڕیاری ناڕەوای دەرەکیی دانراوە و بە زەبر و زەنگ و لە سەر خوێن و لاشەی« ئەوانی دیکە» کەوتووەتە سەر پێ.
ئەوەی لەم چرکە ساتەدا کە گیانی دوو کیژی ڕوو سووری نیشتمان لە ژێر ھەڕەشەی ئێعدام دایە گرینگە، ئەوەیە کە ھەموو کوردستان خاوەندارێتییان لێ بکا و بە دروستکردنی گوشاری ھەمەلایەنە و ھەنگاوی پێویستی وەک گردبوونەوە و مانگرتن و خۆپیشاندان، ڕێ لە ئێعدامیان بگیرێ. داوا لە ھەموو ڕۆڵەکانی نیشتمان دەکەین لە سەر ھەست بن و لە کاتی گونجاودا، بە ڕەفتار و  ھەنگاوی پێویست، گیانی کچە بە دیل گیراوەکانمان ڕزگار بکەن.
لە ئاستی ستراتیژیی و درێژمەودا دا، پاراستن و ئاسایشی کوردستان و کورد بە دەرچوون لە ژێر تەوقی سەروەریی ئێران و بەدەستھێنانی سەربەخۆیی و پێکھێنانی دەوڵەتی کوردستان مسۆگەر دەکرێت.

پارتی ئازادیی کوردستان PAK
٢٣ی بەفرانباری ٢٧٢٤ ک
١٢ ی ژانوییەی ٢٠٢٥ ز