بەیاننامەی پارتی ئازادیی کوردستان PAK بە بۆنەی 34 هەمین ساڵوەگەڕی کیمیا بارانی هەڵەبجە

15/03/2022

بەیاننامەی پارتی ئازادیی کوردستان PAK
 بە بۆنەی 34 هەمین ساڵوەگەڕی کیمیا بارانی هەڵەبجە

    34 ساڵ لەمەوبەر دەوڵەتی داگیرکەری عێڕاق، لە 16 ی مارسی 1988دا، تاوانێکی بێوێنەی دژی رۆڵەکانی نەتەوەکەمان لە هەڵەبجەی باشووری کوردستان خۆلقاند کە تێیدا زیاتر لە 5000 مرۆڤی بێتاوان و سڤیلی کورد بوونە قوربانیی و 10000 کەسیش بریندار و ئیفلیجی لێکەوتەوە.
کارەساتی کیمیا بارانکردنی هەڵەبجە تراژیدیایەکی مرۆڤی و یەکێ لە تاوانە هەرە گەورەکانی پڕۆسەی کوردقڕان و ژێنۆسایدی کوردی دابەش و خاک داگیرکراو بوو. ئەو تاوانە درێژە و بەردەوامیی هەزاران تاوانی پێشتر بوو کە سەدان ساڵ بوو لە پێناو تواندنەوەی کورد و تاڵانی کوردستان لە لایەن داگیرکەرانی کوردستانەوە بەڕێوە چوو بوون.  
   لەلایەکی دیکەوە ، ئەگەرچی ئەو تاوانە لە لایان  دەسەڵاتی فاشیستیی بەعسییەکانەوە خوڵقا، بەڵام لەهەمانکاتدا پەڵەیەکی رەش بوو بە ناوچاوانی زلهێزەکان و کۆمەڵگای جیهانیی بە گشتیی و رێکخراوی نەتەوەیەکگرتووەکان بە تایبەتی. بەرژەوەندیی وڵاتانی بڕیاربەدەستی ئەو سەردەمە ئەگەر لە لایەک بواری بۆ دەوڵەتی عێراق رەخساند کە تاوانی وەها جەرگبڕ بخوڵقێنێت، لە لایەکی دیکەوە هۆکاری ئەوەش بوو کە چاو و گوێی جیهان لە حاند ئەو کۆمەڵکوژییە کوێر و کەڕ بێت. ئێستاش سەرەڕای هەموو درووشم و بڕیارنامە بریقەدارەکانی رێکخراوی نەتەوەیەکگرتووەکان بۆ پێکەوە ژیان و ڕێز گرتن لە ماف و ناسنامە و کەلتوورە جیاوازەکان، جێی داخە کە بەرژەوەندییە سیاسیی و ئابوورییەکانی دەوڵەتە گەورەکان، بەردەوام دەرفەتی بەکارهێنانی سەرکوت و زەبر و زەنگ و  پێشێل کردنی پرێنسیپەکانی یەکسانیی گەلان و  مرۆڤسالاریی و دادپەروەریی  بۆ دەوڵەتە داگیرکەرو دیکتاتۆر و تووتالیتێرەکان دەخوڵقێنێت.
رۆڵه‌كانی نه‌ته‌وه‌ی كورد و كوردستانیانی نیشتمانپارێز له‌ هه‌موو پارچه‌كانی وڵاته‌ دابه‌شكراوه‌كه‌مان،‌ پێویسته‌ له‌و راستییه‌ دڵنیا بن كه‌ ئه‌وه‌ی ده‌رفه‌تی بۆ به‌غدا ره‌خساند ئه‌و تاوانه‌ بخوڵقێنی و به‌هه‌مان شێوه‌ رێگای بۆ تاران و ئانكارا و دیمه‌شق ته‌خت كردووه‌ كۆمه‌ڵكووژی دژی كورد ئه‌نجام بده‌ن، نه‌بوونی سه‌روه‌ریی سیاسیی و بێده‌وڵه‌تیی كوردە. 
 پاش  34 ساڵ له‌ كیمیابارانی هه‌ڵه‌بجه‌، برینی ئه‌و كاره‌ساته ‌ئه‌وه‌نده‌ قووڵه ‌‌كه‌ تێپه‌ڕینی وه‌رز و ساڵه‌كان، ساڕێژی ناكەن. نه‌‌ساڵوه‌گه‌ڕگرتن،نه‌‌ قه‌ره‌بوو‌ی مادی، نه‌گریان و مه‌زڵووم نومایی و نه‌ تراویلكه‌ی دێموكراسیی ده‌وڵه‌ته داگیركه‌ره‌كان، چاری ئه‌م برینه‌ ناكه‌ن و ده‌سته‌به‌ری دووپات نه‌بوونه‌ی نیین‌. ته‌نیا سه‌ربه‌خۆیی و به‌ده‌وڵه‌تبوونی كوردستان، دەتوانێ ده‌سته‌به‌ری روونه‌دانه‌وه‌ی كاره‌ساتی له‌وجۆره‌ بێت‌. هه‌تا هه‌ر داگیركه‌رێكی فارس و تورك و عاره‌ب، له‌ سه‌ر كوردستان و نه‌ته‌وی كورد خاوه‌ن ده‌سه‌ڵات وسه‌روه‌ریی بن، هه‌رده‌م هه‌ڕه‌شه‌ی كوشتار و ماڵوێرانکردنی كورد له‌‌ ئارادایە. بۆیه‌ تێكۆشانی هه‌ر تاك و گرووپ و پارت و پێكهاته‌یه‌كی سیاسیی كوردستان، كاتێ ده‌توانێ پیرۆز و پێویست و به‌به‌رهه‌م بێت كه‌ له‌ پێناو هه‌ڵگرتنی سه‌روه‌ریی ئه‌و ده‌وڵه‌تانه‌ له‌سه‌ر كوردستان و گه‌یشتن به‌ ده‌وڵه‌ت و سه‌ربه‌خۆیی كوردستان بێت.
لە 34 هەمین ساڵوەگەڕی کیمیا بارانی هەڵەبجەدا هەزاران سڵاو دەنیرین بۆ گیانی پاکی هەموو شەهیدانی هەڵەبجە و سەرجەم شەهیدانی رێگای ئازادیی و سەربەخۆیی کوردستان.

پارتی ئازادیی کوردستان PAK

25 رەشەمەی 2721 کوردی
16ی مارسی 2022 زاینیی