ڕاگەیەندراوی ژمارە( 85 )ی ڕاپەڕینی کوچک و بەردی رۆژهەڵاتی داگیرکراو "ڕاپەڕین تا ڕاماڵینی داگیرکەران لە نیشتمان"

17/11/2022

ڕاگەیەندراوی ژمارە( 85 )ی ڕاپەڕینی کوچک و بەردی رۆژهەڵاتی داگیرکراو
"ڕاپەڕین تا ڕاماڵینی داگیرکەران لە نیشتمان"

ئەمڕۆ ٢٦ خەزەڵوەر لە ٦٢ یەمین رۆژی راپەڕینی رۆژهەڵاتی داگیرکراودا، رۆڵە ئازا و قارەمانەکانی ڕۆژهەڵات، ئەم راپەڕینە پڕشکۆیەیان پاراست و درێژەیان پێدا.
ئەمڕۆ لە بۆکان و سەقز لە رێوڕەسمی ئەسپەردەکردنی شەهیدانی دوێنێ‌شەوی راپەڕین ‌دا سەدان کەس بەشدارییان کرد و لە سنە، چلەی شەهیدانی ئەو شارە بە بەشداریی هەزاران کەس بەرز راگیرا؛ خەڵکی راپەڕیو لەسەر گڵکۆی شەهیدان و لەسەر شەقامەکان بە دروشمی نەتەوەیی و بە ئیرادەیەکی بەرزەوە بەردەوام بوون لە راپەڕینی پڕشکۆیان.
ئەمڕۆ وێڕای مانگرتن و داخستنی دوکان و بازاڕەکان لە زۆربەی شارەکانی رۆژهەڵات؛ کچ و کوڕانی بوێری نیشتمان لە سەقز، سنە، بۆکان، کامیاران، مەهاباد، پاوە، کرماشان، قوروە، بیجاڕ، بانە، لوڕستان، سەرابلە، ئیزە، ئابدانان، دێولان، سەرپێلی زەهاو و پیرانشار، یەک دەنگ و یەک هەڵوێست رژانە سەر شەقام و گۆڕەپانەکان و بە هەنگاوی پتەویان و بە هەڵکردن و شەکانەوەی ئاڵای پیرۆزی کوردستان و وتنەوەی سروودی نەتەوەیی ئەی رەقیب دڵی دوژمنی داگیرکەریان لەرزاند. هێزەکانی دەوڵەتی داگیرکەر بۆ سەرکوت و بڵاوەپێکردنی خەڵکی راپەڕیو دەستیان لە هیچ جینایەتێک نەپاراست و بەتەقەی راستەوخۆ‌ ژمارەیەک لە خەڵکی بوێر و ئازای ئەم نەتەوەیان شەهید و بریندار کرد.
وێڕای ئەمانەش دەوڵەتی داگیرکەری ئێران لە دەسبەسەرکردن و بێسەروشوێنکردنی خەڵکی راپەڕیو لەسەر شەقامەکان و لە ماڵەکانی خۆیان غافڵ نەبووە و ژمارەیەک لە رۆڵەکانی ئەم نیشتمانە چارەنووسیان نادیارە. کچ و کوڕانی رۆژهەڵات لە بەرانبەر تاوانەکانی هێزەکانی دەوڵەتی داگیرکەر وەستاونەتەوە و بەرپەرچی پەلامارەکانیان داوەتەوە و دیفاعی رەوایان لە خۆیان و راپەڕین کردووە.

پارتی ئازادیی کوردستان PAK
کۆمیتەی راگەیاندن
٢٦ خەزەڵوەر ٢٧٢٢ک
١٧ نۆڤامبری ٢٠٢٢ز