​ ٩ ناوەندی بیری( تینک تانک) ئەمریکا دەڵێن: ئێران لە دروستکردنی چەکی ئەتۆمی نزیک بووەتەوە

12/07/2024

نۆ ناوەندی بیر و گرووپی چالاکیی ئەمریکا، راپۆرتێکی هاوبەشیان بە مەبەستی ئاگادارکردنەوە لە مەترسیی  نزیک بوونەوەی ئێران لە دەست راگەیشتنی بە چەکی ئەتۆمیی، بڵاوکردووەتەوە.
هاوپەیمانییەک لە نۆ ناوەندی بیرکردنەوە و گروپی چالاکی ئەمریکا، لەوانە " هاوپەیمانیی ڤاندنبێرگ" و "دامەزراوەی بەرگریی لە دیموکراسی" و "یەکێتیی دژی ئێرانی ئەتۆمیی" و...هتد  لە راپۆرتێکی هاوبەشدا هۆشدارییان داوە کە ئێران لە قۆناغی کۆتایی بەرهەمھێنانی چەکی ئەتۆمییە و توانیویە بەڕادەی پێویست یۆرانیۆمی پیتێنراو بەرهەم بێنێت و لە رۆژانی داهاتوودا دەستی بەو چەکە ڕادەگا.
ئەم گرووپانە بە بڵاوکردنەوەی ئەم ڕاپۆرتە، ئاماژەیان بەوە کردووە کاتی پشتگوێخستنی مەترسی و هەڕەشەکانی ئێران بەسەرچووە و سیاسەتەکانی جۆبایدن بەرانبەر بە ئێران بێکاریگەر بووە. هەروەها داوایان لە سەرۆک کۆماری داهاتووی ئەمریکا کردووە کە بە خێرایی "بژاردەی سەربازی باوەڕپێکراو" بۆ پێشگرتن لە دەستڕاگەیشتنی ئێران بە چەکی ئەتۆمی و "ستراتیژیێکی یەکگرتوو و هەمەلایەنە" بۆ ڕووبەڕووبوونەوەی هەڕەشەکانی ئێران پەرەپێبدەن.