کامیاران؛ دەسبەسەرکرانی ژمارەیەک چالاکی مەدەنی و ژینگەپارێز

24/07/2024

بەگوێرەی راپۆرتی رێکخراوی مافی مرۆڤیی هەنگاو؛ ئەمڕۆ چوارشەممە ٣ی گەلاوێژی ٢٧٢٤ ک، دوای بەڕێوەچوونی رێوڕەسمی ئەسپەردەکردنی تەرمی ئیسماعیل کەریمی ؛ هێزەکانی دەوڵەتی داگیرکەری ئێران لە رێستۆرانتی "کوێستان" لە رێگەی نێوان سنە- کامیاران هێرشیان کردووەتەسەر ژمارەیەک چالاکی مەدەنی و ژینگەپارێز و لانیکەم ١٠ کەسیان دەسبەسەرکردووە.
ناسنامەی شەش کەس لە دەسبەسەرکراوان ئاشکرا کراون کە بریتیین لە: فەریدە وەیسی، حەمید سەبزە، فەرزین موەففەقی، ئەمیر نەدیمی، حیسام مەهدی و ئامانج قوربانی.
جێگای ئاماژەیە ئیسماعیل کەریمی چالاکی ژینگەپارێزی خەڵکی کامیاران، دوو رۆژ لەمەوبەر لەکاتی کوژاندنەوەی ئاگردا لە ٪٨٠ جەستەی سووتا  و سەرلەبەیانیی ئەمڕۆ بەهۆی سەختیی برینەکەیەوە گیانی لەدەستدا و هەر ئەمڕۆ لەنێو ئاپۆڕای خەڵک و بە وتنەوەی دروشمی " شەهید نامرێ" و " ئیسماعیل قارەمانە، شەهیدی کوردستانە" لە کامیاران بەخاک سپێردرا.