نوێنەرایەتیی پارتی ئازادیی کوردستان لە دەرەوەی وڵات پاڵپشتیی خۆی لە بڕیاری داخستنی ناوەندە تیرۆریستییەکانی ئێران لە ئاڵمان رادەگەیەنێ

24/07/2024

نوێنەرایەتیی پارتی ئازادیی کوردستان لە دەرەوەی وڵات پاڵپشتیی خۆی لە بڕیاری داخستنی ناوەندە تیرۆریستییەکانی ئێران لە ئاڵمان رادەگەیەنێ

سەرلەبەیانی ئەمڕۆ پولیسی ئاڵمان بە بڕیارێکی دادگای ئەو وڵاتە ناوەندی ئیسلامی هامبورگی کۆماری ئیسلامی ئێران کە بە مزگەوتی ئیمام عەلی ناسرابوو بۆ هەمیشە داخست. هاوکات سەرجەم ئەو ناوەندانەی سەر بە ناوەندی ئیسلامی هامبورگ بوون لە لایەن پولیسی ئاڵمانەوە لە زۆربەی هەرەزۆری شارەکانی ئاڵماندا داخران و قەدەغە کران.
کۆکردنەوە و قەدەغە کردنی هێلانە سیخوڕییەکانی دەوڵەتی داگیرکەری ئێران لە وڵاتی ئاڵمان کە چەندین دەیەیە لە ژێر ناوی ئیسلام و موسوڵمانێتیدا بوونەتە مەکۆی فیتنە و نانەوەی ئاژاوە و پەروەردەی سیخۆڕ و تیرۆریزمی نێودەوڵەتی، نەک هەر بڕینەوە و کورتکردنەوەی دەستی بەکرێگیراوەکانی دەزگا سیخوڕی و تیرۆریستییەکانی کۆماری ئیسلامی ئێرانە لە ئاڵمان و ئورووپادا، بەڵکوو  لە تەنیشت ئەو حەولانەشە کە ماوەیەکە بۆ بە تیرۆریست ناساندنی سوپای پاسدارانی کۆماری ئیسلامی ئێران لە ئاستی ژمارەیەک لە وڵاتانی ئورووپایی لە گۆڕێدایە.
دەستەی نوێنەرایەتی پارتی ئازادیی کوردستان لە دەرەوەی وڵات وێڕای دەربڕینی خۆشحاڵی و دەسخۆشی لە بڕیارەکانی دادگای ئاڵمان و هەڵمەتی کۆکردنەوە و قەدەغەکردنی ناوەندە تیرۆریستی و جاسووسییەکانی کۆماری ئیسلامی ئێران لە گشت شارەکانی ئاڵمان، پاڵپشتی خۆی لەو بڕیارە رادەگەیەنێت و بە هەنگاوێکی گرینگ و بەجێی دەزانێ و لە هەنکاتدا داوا لە وڵاتانی ئورووپایی دەکا بە قەدەغە کردنی ناوەندە تیرۆریستییەکانی ئێران لە وڵاتەکانیان پاڵپشتی خۆیان لە بڕیارەکەی دەوڵەتی ئاڵمان رابگەیەنن.

دەستەی نوێنەرایەتیی پارتی ئازادیی کوردستان لە دەرەوەی وڵات
٣ گەلاوێژی ٢٧٢٤ ک
٢٤ ژوولای ٢٠٢٤ ز