پەیامی رێکخراوی لاوانی ئازادیی کوردستان بەبۆنەی ٣٠ گوڵان

19/05/2024

پەیامی رێکخراوی لاوانی ئازادیی کوردستان بەبۆنەی ٣٠ گوڵان

پیرۆزبێت ٣٠ گوڵان، ٣٣ ساڵەی دامەزرانی پارتی ئازادیی کوردستان، حیزبی لاو و سەرسەختی کوردستان

لاوانی تێکۆشەری نیشتمان!
کوردستانیانی خۆڕاگر!

ئەمڕۆ ٣٠ گوڵان، ٣٣ ساڵ تێپەڕدەبێ بەسەر ئەو هەنگاوە مەزنەی لەلایان پۆلێک لاوی تێکۆشەر و نەتەوەیی رۆژهەڵاتی کوردستانەوە بۆ دامەزراندنی پارتێکی کوردستانی نرا.
٣٣ ساڵ لەمەوبەر، کۆمەڵێک لاو کە تەمەنی هیچیان نەگەیشتبووە ٣٠ ساڵ، بە دامەزراندنی پارتێکی کوردستانی، بە بیر و دیسکۆرسی کوردستانییەوە، کەلێنێکی گەورەی بزووتنەوەی نەتەوەی کوردیان لە رۆژهەڵاتی نیشتمان پڕ کردەوە. ئەو کەلێنەی کە لە دوای رووخانی دەوڵەتی جمهووریی کوردستانەوە بزووتنەوەی کورد لە رۆژهەڵات و خەڵکی کوردستان بەدەستیەوە دەیانناڵاند.
دامەزراندنی PAK دەسپێکی قۆناغێکی نوێی خەباتی نەتەوەکەمان و خاڵی وەرچەرخان بوو بۆ تێگەیشتن لە پرسی راستەقینەی کورد و خوێندنەوەی دروست بۆ واقعی داگیر و دابەشکراویی کوردستان و تەسلیم نەبوون بەو واقعە تاڵە و هەوڵ دان بۆ کۆتاییپێهێنانی.
پارتی ئازادیی کوردستان ئەو حیزبە لاوەی کە پێچەوانەی شەپۆلە باوەکان مەلەی دەکرد و لەسەردەمێکدا لەدایک بوو کە سەرجەم بزووتنەوەکانی رۆژهەڵات، پرسی کوردیان بەبەشێک لە ئێران پێناسە دەکرد و ئامانجیان مانەوە بوو لەو چوارچێوەیەدا و بیری سەربەخۆییخوازیی پارتی ئازادیی کوردستانیان بە ناواقعبینانە، نەکردە، ئەستەم و بە کەف و کوڵی جەوانانە لێکدەدایەوە. PAK پێداگرانەتر لەسەر رێباز و رەوتی خۆی بەردەوام بوو و توانی ببێتە مەکۆی کوردایەتی و کوردستانی‌بوون، و قوتابخانەی پێگەیاندنی خەڵکی تێکۆشەر و سەربەخۆیی خوازی کوردستان.
پارتی ئازادیی کوردستان، حیزبی لاوان و قوتابییان، بە داهێنانە فیکرییەکانی، بە ئەدبیاتی سیاسیی کوردستانی و کوردستان‌تەوەریی، بە گرتنەبەری رێگا و رێبازی سەرکردە شەهیدەکانی رێگای سەربەخۆیی کوردستان، بە هەڵکردنەوەی ئاڵای پیرۆزی نیشتمان، بە رەتکردنەوەی واقعی تاڵی داگیرکراویی کوردستان و بە ئامانج و دیسکۆرسی شەفافەوە، ئەوڕۆکە جێگای هومێد و هیوای هەموو خەڵکی کوردستانە.
سڵاوی رێز و وەفا بۆ رێبەری شەهید کاک سەعیدی یەزدانپەنا دامەزرێنەری PAK و سەرجەم شەهیدانی کوردستان و شەهیدانی ٣٣ ساڵ تێکۆشانی بێوچانی پارتی ئازادیی کوردستان.

بەرز و پیرۆز بێت ٣٠ گوڵان، ٣٣ ساڵ خەبات، تێکۆشان و رچەشکێنیی پارتی ئازادیی کوردستان.

رێکخراوی لاوانی ئازادیی کوردستان RAK
٣٠ گوڵانی ٢٧٢٤ ک
١٩ مای ٢٠٢٤ ز