حەمید مورادی چووە ریزی شەهیدانی ژینگە و پاراستنی سروشتی کوردستانەوە

پێش 2 هەفتە

حەمید مورادی چووە ریزی شەهیدانی ژینگە و پاراستنی سروشتی کوردستانەوە

لە دوێنێ ئێوارەوە پانتاییەکی زۆر لە سروشتی ئاویەر گڕی تێبەردرا و ژینگەی نیشتمان نووقمی ئاگر و دووکەڵ بوو، ژینگەپارێزانی کوردستان فیداکارانە بە بەهاناوەچوون بۆ دامرکاندنەوەی ئاگرەکە و کوژاندنەوەی ئەو ئاگرەی دوژمن لە سروشت و نیشتمانمان بەریان‌داوە، سەلماندیان پاراستنی دار و بەرد و سروشت و ژینگەی ئەم نیشتمانە بەشێکی دانەبڕاو لە ناسنامەی نەتەوەیی و کوردستانن و بەشێکن لە خەبات و تێکۆشان بۆ بەرەنگاربوونەوەی داگیرکەران و پیلانەکانیان.
لە هەڵمەتی کۆنترۆڵکردن و دامرکاندنەوەی ئاگرەکەدا، ژمارەیەک لە رۆڵەکانی نیشتمان برینداربوون و "حەمید مورادی"بەرپرسی رێکخراوی شنەی نەوژین بە سەختیی برینداربوو و پاش چەند سەعات مانەوە لە نەخۆشخانە ئەوڕۆ دڵی مەزنی لەلێدان کەوت و چووە ریزی شەهیدانی ژینگە و پاراستنی سروشتی کوردستان.
ئازایەتیی ژنان و پیاوانی ژینگەپارێز و فیداکارییان لە رێگای پاراستنی سروشتی نیشتمان و شکستپێهێنانی پیلانگێڕییەکانی دەوڵەتی کۆلۆنیالیستیی ئێران بۆ تێکدان و تەفروتوناکردنی؛ دەرخەری ئەوەن ئەو دەوڵەتە سەرەڕای گرتن، کوشتن، ئێعدام و برسیکردنی کوردستانییان و  پەلاماردانی زیندەوەر و ژینگە و دار و بەردی کوردستانیش ناتوانێ ئەم نیشتمان و نەتەوە بەچۆکدابێنێ.
پاشنیوەڕۆی ئەوڕۆ، تەرمی شەهیدی پاراستی ژینگەی نیشتمان "حەمید مورادی" لە گۆڕستانی بەهەشتی محەممەدیی سنە ئەسپەردەی خاک دەکرێ؛  و  داواکاریین کوردستانییان، دڵسۆزان و فیداکارانی پاراستنی نیشتمان بەتەنیا جێنەهێڵن و بە وتنەوەی دروشم و سروودی نەتەوەیی و سروودی "خوایە وەتەن ئاوا کەی"  شەهیدی ژینگە، رەوانەی دوا مەنزڵگەی بکەن.
پارتی ئازادیی کوردستان
٣ی گەلاوێژی ٢٧٢٥ ک
٢٥ی ژوولای ٢٠٢٥ ز


https://t.me/pazadik_pak