راگەیەندراوی PAK سەبارەت بە لێدوانەکانی نێردەی ئەمریکا بۆ سووریا

پێش 3 هەفتە

راگەیەندراوی PAK سەبارەت بە لێدوانەکانی نێردەی ئەمریکا بۆ سووریا

لە رۆژانی پێشوودا، تۆم باراک، نێردەی تایبەتی ئەمریکا لە سووریا، لە لێدوانەکانی‌دا رایگەیاند کە "فیدراڵیی بۆ عێراق و سووریا گونجاو نییە و هەموو رێگاکان دەچنەوە بەغدا و دیمەشق" و لەمەڕ سووریا پێی لەسەر ناسنامەی "یەک وڵات، یەک سپا، یەک نەتەوە و یەک حکومەت" داگرت.
هەرچەند لەوە ناچێ ئەم لێدوانانەی نێردەی تایبەت، دەربڕی روانگەی فەرمیی ویلایەتە یەکگرتووەکان بێ، بەڵام لە ئاستی خۆی‌دا زەبرێک بوو لە پرستیژی ئەمریکا لە ناوچەکە.
لێدوانەکانی تۆم باراک یان لە بێ‌ئاگایی ناوبراوەوە لە رووداوەکانی یەک سەدەی رابردووی ناوچەکەوە هەڵدەقوڵێ یان لە کورت‌بینیی سیاسییەوە. تۆم باراک دەبوو بزانێ کە ئەوە عەقڵییەت و پڕۆژە و تەرتیباتی سیاسیی " یەک نەتەوە" و " یەک ناسنامە" و " یەک حکومەت"بوو دەوڵەتانی وەک عێراق و سووریا و ئێران و تورکیای نوقمی قەیران کردووە و لە یەک سەدەی رابردوودا، ئاسایشی مرۆڤیان خستە بەر هەڕەشە و تیرۆر و میلیتاریزم و تووتالیتاریزم و دیکتاتۆرییان خولقاند و ناوچەکە بەهۆیانەوە، ئێستاش کوانووی شەڕ و ململانێ و توندوتیژییە. 
نێردەی تایبەت ئەگەر بە خەمی ئەو کۆمەڵگایانەوە نییە کە لەو ١٠٠ ساڵەدا لە ژێر حوکمی سیستەمیەلی: "یەک ناسنامە، یەک زمان، یەک حکومەت" بوونەتە قوربانیی، دەبوو خوێنی سەربازانی ئەمریکا و بەها و بەرژەوەندییە مادی و نامادییەکانی وڵاتەکەی بە هێند گرتبا کە بە راستەوخۆ یان ناڕاستەوخۆ لەلایان دەوڵەتانی " یەک حکومەت، یەک ناسنامە" ـەوە کراونەتە ئامانج و زیانیان لێداوە.
پارتی ئازادیی کوردستان وەک پارچەیەک لە جەستەی خاک و نەتەوەیەک کە برینداری نەخشە و تەرتیباتی " یەک ناسنامە، یەک وڵات، یەک حکومەت"ـە؛ ئەو تێگەیشتن و لێدوانانەی نێردەی تایبەت رەت دەکاتەوە و داوا لە ئیدارەی ئەمریکا دەکات، دان بە مافی دیاریی‌کردنی چارەنووسی نەتەوەی کورد و نەتەوە پەراوێزخراوەکانی دیکەی ناوچەکە دابنێ و ئەزموونی کارەساتباری سایکس_بیکۆ و لۆزان تاقیی نەکاتەوە.

پارتی ئازادیی کوردستان PAK
٢٣ی پووشپەڕی ٢٧٢٥ک
١٤ی ژوولای ٢٠٢٥ ز