کوردستان نابێتە کەرەستەی پڕۆژە و پلانەکانی بەڕێوەبەرانی دەوڵەتی ئیستیعماریی ئێران ڕاگەیەندراوی PAK سەبارەت بە شانۆگەریی هەڵبژاردنی سەرکۆماریی ئێران

25/06/2024

کوردستان نابێتە کەرەستەی  پڕۆژە و پلانەکانی بەڕێوەبەرانی دەوڵەتی ئیستیعماریی ئێران

ڕاگەیەندراوی PAK سەبارەت بە شانۆگەریی هەڵبژاردنی سەرکۆماریی ئێران

  تاران هەموو تواناکانی خستووەتە گەڕ بۆ ئەوەی ڕێژەیەکی زۆری خەڵک ڕۆژی هەینی ٨ی پووشپەڕ، ڕکێشی سەر سنووقەکان و بەشداریی شانۆگەریی هەڵبژاردنی سەرکۆماریی بکات.
  دەوڵەتی ئێران قەوارەیەکی سیاسیی ئیستیعمارییە کە لەسەر بنەمای داگیرکردنی لەشکریی خاکی کوردستان و نیشتمانی نەتەوە نافارسەکانی دیکە و ژێنۆساید و زمانکوژیی و ئاسمیلاسیۆن و فارسیفیکاسیۆن و داسەپاندنی ناسنامەی ساختە و تاڵانی سامانی نیشتمانی و تێکدانی شیرازەی کۆمەڵایەتیی کوردستان و ئەوانی دیکە، بنیاتنراوە. بۆیە کوردستان بەشداریی لەو یارییە لەبەرچاو کەوتووەی دەوڵەتی داگیرکەر و ئیستیعمارگەری ئێران ناکات.
کۆماری ئیسلامی حکوومەتی بەڕێوەبەری ٤٥ ساڵی ئەو دەوڵەتەیە بە هێرش و داگیرکاری و  تێرۆر و کوشتاری تاک و بەکۆمەڵی ڕۆڵەکانی کوردستان . بۆیە کوردستان لە پلان و ستراتیژیی خۆڕێکخستنەوەکانی ئەو قەوارەیەدا بەشداریی ناکات.
  ئەوانەی دەستچن کراون بۆ ئەوەی بۆ گەیشتن بە کورسیی سەرکۆماریی ڕکەبەریی بکەن و یەکتر لە قاو بدەن، پۆلێک کارگوزاری جەنایەتکاری دەوڵەتی داگیرکەرن کە نەک شایانی ئەوە نیین دەنگی خەڵکیان بە نسیب بێت، بەڵکوو ڕەوای ئەوەن لە دادگایەکی دادپەروەردا لە سەر دەوریان لە تاوان و جەنایەتدا، بهێندرێنە گاز و گیر. ڕکەبەریی و یەکتر لەقاودانەکانی ئەم پۆلە تاوانبارە کاریکاتۆرێکە لە ڕکەبەریی دێموکراتیک کە بەیتی خامنەیی بە ئامانج و ستراتیژی تایبەت، چوارچێوەکەی داڕشتووە و ئاراستە و ئیدارەی دەکات. خەڵکی کوردستان بەو فریوکاریی و عۆینبازییە، لە سەر خوانی خوێناوی بکوژانی ژینا و ڕاپەڕینی ژینا دانانیشن.
  خامنەیی و کوڕ و دارودەستەکەی وەک کاکڵی حکوومەت و دەسەڵاتی سیاسیی ئێران ، کورسیی سەرکۆماریی لە دەست خۆیاندایە و پاش بەڕێوەچوونی شانۆگەرییەکە، کێ بە باشتر بزانن بەوی دەبەخشن، بەڵام بۆ سەرکەوتنی پلان و ستراتیژیی ئەم قۆناغەیان پێویستیان بە ڕیز بەستنی هەرچی زۆرتری خەڵکە لە سەر سنووقەکانی دەنگدان و پیشاندان و نواندنەوەی دیمەنەکانی. کوردستان، مەکۆی ١٠٠ساڵ ملنەدان بە دەوڵەتی داگیرکەری فارس و ٤٥ ساڵ بەرەنگاربوونەوەی کۆماری ئیسلامیی، نابێتە کەرستەی پلان و ئامانجەکانی خامنەیی و دەست و پێوەندەکانی.
کوردستان شانۆگەریی هەڵبژاردنی سەرکۆماریی بایکۆت دەکات و بەمجۆرە دامەزراوەی هەڵبژاردنی داگیرکەر ریسوا و پەک دەخات.
پارتی ئازادیی کوردستانPAK

٥ی پووشپەڕی ٢٧٢٤ک
٢٥ی ژووئەنی ٢٠٢٤ز