ڕاگەیاندراویPAK سه‌باره‌ت به‌ ئێعدامی موحسین شکاری و شەهیدکردنی شادمان ئەحمەدی لەژێر ئەشکەنجە لەلایان دەوڵەتی داگیرکەر

08/12/2022

ڕاگەیاندراویPAK سه‌باره‌ت به‌ ئێعدامی  موحسین شکاری  و شەهیدکردنی  شادمان ئەحمەدی لەژێر ئەشکەنجە لەلایان دەوڵەتی داگیرکەر

رۆڵه‌كانی نه‌ته‌وه‌ی گه‌وره‌ی كورد!
كوردستانیانی نیشتمانپه‌روه‌ر!
خەڵکی ڕاپەڕیوی کوردستان!

    هاوكات له‌گەڵ  کوشتاری بێ بەزەییانەی هاووڵاتیانی سڤیل و  ڕۆڵە ڕاپەڕیوەکانی نەتەوەکەمان لە سەر شەقامەکان و هێرشی دڕندانە بۆسەر خەڵک لەلایان ڕێژیمی داگیرکەری تاران، سەر لە بەیانی ئەمڕۆ ۱۷ی سەرماوەز تاران، بە ئامانجی چاوترسێنی ڕۆڵەکانی نیشتمان، تاوان و جینایه‌تێکی دیکە دژ بە ڕۆڵەیەکی  بێتاوانی نەتەوەکەمان ده‌خوڵقێنێ و   “ موحسین شکاری”  کە له نێو خۆپیشاندان و ڕاپەڕینی ڕاماڵینی داگیرکەردا ڕفێندرابوو ، به‌ سێداره‌ سپارد.
هەروەها هەر ئەمڕۆ شادمان ئەحمەدی یەکێکی دیکە لە گیراوانی ڕیزەکانی خەڵکی ڕاپەڕیوی ڕۆژهەڵات لەژێر ئازار و ئەشکەنجەی قورسی دوژمندا گیانی لەدەستدا.
پارتی ئازادیی كوردستان ، داخ و په‌ژاره‌ی خۆی لە ئێعدامی" موحسین شکاری"  و ڕۆح ئەستاندنی" شادمان ئەحمەدی " ده‌رده‌بڕێ و  هاوبەشی خەمی  بنەماڵە و کەسوکار  و هاوڕێ و هەڤاڵەکانیانە و سەرەخۆشی لە گشت خەڵکی کوردستان دەکا.
هەروەها ڕایدەگەیەنێ کە نەتەوەکەمان بە  تاوان و  کوشتاری بێبەزەییانەی ڕۆڵەکانی ، ناچەمێن و نەک شەقامەکان چۆڵ ناکەن و ڕاپەڕین کۆتایی نایە ، بەڵکو خه‌می  هەموو ئه‌و غه‌در و تاوانانه‌ ده‌خاته‌ سه‌ر رقی پیرۆز و بڕیاری لێبڕاوی كه‌ ده‌بێ هێزه‌داگیركه‌ره‌كانی به‌رفه‌رمانی تاران له‌ كوردستان رابماڵرێن و كۆتایی به‌سه‌روه‌ریی ئێران به‌ سه‌ر نیشتمانی داگیركراومان بێ.
هاوکات ڕوو لە گشت رێکخراوە نێودەوڵەتییەکانی مافی مرۆڤ و کۆمەڵگای  جیھانی و ناوەندە بڕیاربەدەستەکان  دەکەین کە گیانی هەزاران  مرۆڤی کورد کە لەم دواییانەدا لە زیندان ئاخێدراون لەمەترسی مەرگدایە و پێویستە بە بڕیاری ئازایانە و مرۆڤ دۆستانە، رێگری لە  کوشتاری بەکۆمەڵی بەندکراوانی کورد بگرن.

پارتی ئازادیی كوردستانPAK
١٧ سەرماوەز ٢٧٢٢ ک
٨ دیسامبری ٢٠٢٢ ز