راگەیەندراویPAKبۆ مەحکووم کردنی پەلاماردانی فڕۆکەخانەی سلێمانی

08/04/2023

راگەیەندراویPAKبۆ مەحکووم کردنی پەلاماردانی فڕۆکەخانەی سلێمانی

پاشنیوەڕۆی دوێنێ 18 ی خاکەلێوەی 2723 کوردیی، رێکەوتی 7ی ئاپریلی 2023ز، فڕۆکەخانەی مەدەنیی سلێمانی، کەوتەبەر پەلامارێکی درۆنیی و لە سووچێکی سنووری فڕۆکەخانەکەوە ئاگرێکی خستەوە.ئەم هێرشە لە کاتێکدا بوو کە 48 سەعات پێشتر حکوومەتی ترکیا ، هەموو گەشتەکانی نێوان ترکیا و فڕۆکەخانەی سلێمانی راگرتبوو.    بۆیە هەرچەندە هەتاکوو ئێستا وردەکارییەکانی ئەو هێرشە رانەگەیەندراوە،بەڵام زیاترین ئاماژەکان روو لە دەوڵەتی ترکیان.
لە 32 ساڵی پێشوودا، دەوڵەتانی داگیرکەری کوردستان ھەرکات دەرفەتیان گونجاو دیتبێ، لە رێگای زەوی و ئاسمانەوە ، سنوورەکان یان قووڵایی باشووری کوردستانیان بەرپەلامارداوە یان گەلەکۆمەیان دژی هەرێمی کوردستان رێکخستووە؛ بەڵام هەرکاتێ ناکۆکیی نێوان پارتە سیاسییەکان تەشەنەی سەندووە، ئاستی پەلامار و پیلانگێڕییەکانیان بەرزتر و بەرفراوانتر کردووە.
ساڵی رابردوو هێرشە هاژەکی و درۆنییەکانی ئێران بۆ سەرخاکی هەرێمی کوردستان، قەبارەیەکی بەرفراوانی تۆمارکرد.
پارتی ئازادیی کوردستان،هێرش بۆسەر فڕۆکەخانەی مەدەنیی سلێمانی مەحکووم دەکات. PAK هەرجۆرە هێرشێکی داگیرکەرانی کوردستان دژی خەڵک و خاکی باشووری کوردستان، مەحکووم دەکات و داوا لە هاوپەیمانیی نێودەوڵەتیی دەکات لە حاست ئەو دەسدرێژییانە و بەزاندنی سنوور و شکاندنی سەروەریی هەرێمی کوردستان، رێکاری پێشگیرانە بگرنەبەر و رێگە لە درێژەکێشانیان بگرن.
هاوکات داوا لە پارتە سیاسییەکانی هەرێمی کوردستان بە گشتیی و لایەنەکانی پێکهێنەری حکومەتی هەرێم بە تایبەتی دەکات بە گەڕاندنەوەی تەبایی نێوانیان، سنوور و ئاستی پیلانگێڕی و دەسدرێژییەکانی داگیرکەرانی کوردستان، بەرتەسک بکەنەوە.

پارتی ئازادیی کوردستانPAK
19 خاکەلێوەی 2723 کوردی
8 ئاپرێلی 2023 زایینی