با بە ڕاماڵینی داگیرکەر لە خاکی نیشتمان،ئاسایشی ڕۆڵەکانی کوردستان دابین بکەین ڕاگەیەندراوی پارتی ئازادیی کوردستان

09/04/2023

با بە ڕاماڵینی داگیرکەر لە خاکی نیشتمان،ئاسایشی ڕۆڵەکانی کوردستان دابین بکەین
ڕاگەیەندراوی پارتی ئازادیی کوردستان PAK

دەوڵەتی داگیرکەری فارس، بەردەوامە لە خوڵقاندنی تاوان دژی ڕۆڵەکانی کوردستان. جارێکی دیکە،تاران بە دەرمانداو کردنی قوتابیان و مامۆستایانی قوتابخانەکانی کوردستان تاوانی بیۆتێرۆریستیی خوڵقاندووەتەوە.
لە دوێنێ شەممە ١٩ی خاکەلێوەوە، ژمارەیەکی دیکە لە قوتابخانەکانی ورمێ، نەغەدە، دیواندەرە، سەقز و سنە، کەوتوونەتە بەر پەلاماری بیۆتێرۆریستییی دوژمنی داگیرکەر.
بۆ دەنگھەڵبڕین و بەرپەرچدانەوەی ئەو تاوانە دژی مرۆڤییە، ئەمڕۆ خەڵکی کۆڵنەدەری سەقز، هاتوونەتە سەرشەقامەکان و لە خۆپیشانداندان.
ھەتا داڕشتنی ئەم ڕاگەیەندراوە، خۆپیشاندەران لە ھەنگاوێکی پڕ واتادا بە دەم خۆپیشاندانەوە ئاڵای ئێرانیان وەک ھێمای حاکمییەتی داگیرکەر لە سەر کوردستان، لە چەند قوتابخانە کێشاوەتە خوارەوە و بە گڕی قینی پیرۆزیان کردوویانەتە خۆڵەمێش. دەبا ھەڵمەتی داگرتنی ئاڵای داگیرکەر ھەموو نیشتمانی زامدارمان بگرێتەوە!
پارتی ئازادیی کوردستان وەک ھەمیشە لە پێناو دابین کردنی ماف و ئاسایش و بەختەوەریی کوردستانیان، لەسەر درێژەدان بە خەبات بۆ ڕاماڵینی ھێز و دامەزراوەکانی دەوڵەتی داگیرکەر و کۆتاییھێنان بە سەروەریی ئێران لەسەر نیشتمانەکەمان و گەیشتن بە سەروەریی و سەربەخۆیی پێدادەگرێتەوە.
سڵاو لە خەڵکی ڕاپەڕیوی سەقز. سەرکەوێ خەباتی ڕزگاریی وڵات و گەڕاندنەوەی مافی زەوتکراوی چارەنووسیی سیاسیی کوردستان.

پارتی ئازادیی کوردستان PAK
٢٠ خاکەلێوەی ٢٧٢٣ کوردی
٩ ئاپرێلی ٢٠٢٣ زایینی