دەوڵەتی داگیرکەری ئێران حوکمی لەسێدارەدانی بەسەر مامۆستا محەممەد خزرنژاد سەپاند

10/02/2024

دەوڵەتی داگیرکەری ئێران حوکمی لەسێدارەدانی بەسەر مامۆستا محەممەد خزرنژاد سەپاند.
مامۆستا محەممەد خزرنژاد، تەمەن ٤٥ ساڵان و خەڵکی شاری بۆکان، بە تاوانی بەشدارییکردن لە راپەڕینی ژینا، لەلایان دەوڵەتی داگیرکەری ئێرانەوە حوکمی لەسێدارەدانی بەسەردا سەپا.
ناوبراو لە ٢٨ خەزەڵوەری ٢٧٢٢ ک،  لەلایان هێزەکانی ئیتلاعاتی ئێرانەوە هەڵکوترایە سەر ماڵەکەی و خۆی و کوڕەکەی بە بەکارهێنانی توندوتیژیی دەسبەرکران و بۆ ناوەندە ئەمنییەتییەکان گوێزرانەوە و ناچار بەدانپێدانانی زۆرەملێ کران.
مامۆستا محەممەد خزرنژاد لەلایان لقی سێی دادگای شۆڕشی ورمێ، بە سەرۆکایەتیی دادوەر رەزا نەجەفزادە بەتۆمەتی "فصاد في الرض" حوکمی لەسێدارەدان و بەتۆمەتی زیان گەیاندن بە سەربەخۆیی و یەکپارچەیی ئێرانەوە حوکمی ١٥ ساڵ بەندکردنی بەسەرداسەپا.
پارتی ئازادیی کوردستان وێڕای سەرکۆنەکردنی ئەم تاوانە، لەسەر ئەو باوەڕەیە کە دەوڵەتی داگیرکەری ئێران لەدرێژەدان بە تاوانە نامرۆڤانەکانیان و خولقاندنی هیچ تاوان و جەنایەتێک ناپرینگێتەوە؛ گرتن، لێدان، ئەشکەنجە، کوشتن و ئیعدامکردنی رۆڵەکانی ئەم نەتەوەیە بە هەموو چین و توێژێکیەوە لە سیاسەتە دزێوەکانی ئەم دەوڵەتە بووە و ئەم کارەساتانە تا هەڵگرتنی دەسەڵات و سەروەریی ئەو دەوڵەتە داگیرکەرە لەسەر نەتەوە و نیشتمانەکەمان بەردەوام دەبێت و تاکە رێگای رزگاریی و دوایی هاتنی ئەم تاوانانە، کۆتایی هاتن بەم دەوڵەتە کلۆنالیستییە و دامەزراندنی دەوڵەتی نەتەوییمانە.