دامەزراندنی PAK پێویستییەکی مێژوویی بوو

10/04/2023

دامەزراندنی PAK پێویستییەکی مێژوویی بوو

کیژان شوکری

کورد نەتەوەیەکی خاک و نیشتمان داگیر و دابەشکراوە، لە دوای دابەشکرانی یەکەمەوە، خەبات و تێکۆشانی کورد لەپێناو رادانی داگیرکەر، رزگاریی لەژێردەستەیی و یەکگرتنەوەی ئەم نیشتمانە پارچە پارچە کراوە بووە.
سەرجەم ئەو شۆڕش و راپەڕینانەی لە دوای دابەشکردنی یەکەم و دووەمەوە لە هەریەک لە پارچەکانی کوردستان سەری هەڵداوە، خاوەنی مۆرک، ئامانج و ستراتیژیی نەتەوەیی بوون. واتە گشت ئەو شۆڕشانە بە گوێرەی پێویستیی نەتەوەیی و تێگەیشتنی دروست لە پرسی نەتەوەکەمانەوە سەریان هەڵداوە و خەباتیان کردووە.
لە رۆژهەڵاتی کوردستان، لەدوای کۆماری کوردستانەوە هەتاکوو ساڵی1991 رەوتی شۆڕش و بزووتنەوەکانی کورد لەسەر ئەم هێڵە نەتەوەییە ترازا و بزووتنەوەی رزگاریی خوازیی کورد کەلێنێکی گەورەی تێکەوت. درووشم و ئامانجیان  گۆڕانی قووڵی بەسەردا هات و ستراتیژییان لە خودمۆختاری زیاتر نەدەترازا، بە واتایەکی دیکە هیچ شتێک لە دەرەوەی ئەم ستراتیژییە بۆ کێشە و پرسی کورد بەدیی نەدەکرا. درووشم و دیسکۆرسی دیموکڕاسی بۆ ئێران و خودمۆختاری بۆ کوردستان جێی بە بیری نەتەوەیی چۆڵ کردبوو، بە شێوەیەک  کە دەبوو کورد و بزووتنەوەکەی بە گشتیی حەوڵ و وزەی خۆیان بخەنە گەڕ بۆ ئەوەی ماڵی داگیرکەر دیموکراتیزە بکەن. لەلایەکی دیکەشەوە بزووتنەوەی کورد، ئامانج و ستراتیژیی کوردی تەنها بە  دەستەواژەی نامۆ بە پرسی کوردەوە گرێ دەدا.  واتە نزیکەی نیو سەدە بزووتنەوەکانی رۆژهەڵاتی کوردستان رێگا و رێبازی نەتەوەییان لەبیرکرد و لە کوێرەڕێیانی دیموکراتیزەکردنی دەوڵەتی داگیرکەردا بەدوای مافەکانی کورددا دەگەڕان.
لە دایکبوون و هاتنەمەیدانی پارتی ئازادیی کوردستان  بۆ پڕکردنەوەی ئەو کەلێنە گەورەیە بوو کە بزووتنەوەی کورد لە رۆژهەڵاتی کوردستان بەخۆیەوە بینیبوو، PAK هەر لە دامەزراندنیەوە خۆ بە ئێرانی زانینی کوردی ڕەت کردەوە و پێداگریی لە سەر کوردستانی بوون کرد.  ستراتیژیی دەوڵەت و سەربەخۆیی هەڵگرت. ناسنامەی داسەپاوی ئێرانیی لە سەر کورد ڕەت کردەوە و بە دیسکۆرسی کوردستانییەوە وەرچەرخانێکی گەورەی لە بزووتنەوەی کورد لە رۆژهەڵاتی کوردستان دروست کرد.
هەر لە یەکەمین نامیلکەی پارتی ئازادیی کوردستان رێبەری شەهیدمان سەعیدی یەزدانپەنا  فەرموویان: "ئێمە دەمانەوێ ئەو سامە بشکێنین و بە ڕاشکاوی بڵێین کوردین و خەڵکی وڵاتی داگیرکراوی کوردستانین و هەڵوێستمان لە سەر ئەو ئەساسە دیاریی دەکەین،بە بێ ترس و لەرزی سیاسی لەوەی پێمان بڵێن تەجزییەتەڵەب".
لەگەڵ ئەوەی کە پارتی ئازادیی کوردستان ستراتیژیی نەگۆڕی خۆی هەیە و چارەسەری پرسی کورد تەنها لە گەیشتن بە دەوڵەت و سەربەخۆیی‌ دەبینێ، بەڵام لەگەڵ ئەوەش‌دا بڕیار بۆ خەڵک نادا و ویستی خۆی بەسەر خەڵکی وڵاتەکەمان ناسەپێنێ.  بەڵکوو هەوڵ دەدا بۆ دروستکردنی دەرفەت و هەلومەرجێ لە خەڵکی وڵاتەکەمان بپرسرێ چتان دەوێ؟ واتە دەگەڕێتەوە بۆ ویست و دەنگی خەڵکی ڕۆژهەڵاتی کوردستان و بڕیار بۆ خەڵک نادا بەڵکوو لە ڕێگەی ڕێفڕاندۆمێکی گشتییەوە ئەو هەلە دەڕەخسێنێ خەڵک خۆیان ئازادانە، بڕیار لە سەر چارەنووسی خۆیان بدەن واتە "مافی دیاریکردنی چارەنووس".
پاک بۆ گەیشتن بە دەوڵەت و سەربەخۆیی کورد خوێنی تێکەڵ بەم خۆڵە کردووە و کۆڵی نەداوە و کۆڵ نادا لەم پێناوەدا.
بەڵێ دامەزراندنی پاک زەروورەتێکی مێژوویی بوو.