سەربەخۆیی کوردستان پێش هەرشتێک پێویستیی بە بوێریی باسکردنیەتی

14/03/2024

ئەدیب خالدیان

🔸سەربەخۆیی کوردستان پێش هەرشتێک پێویستیی بە بوێریی باسکردنیەتی

🔸"سەربەخۆیی کوردستان" ئەو چەمک و ئامانجە بەهێزەیە کە جیا لەوەی بووەتە مۆتەکەی داگیرکەرانی کوردستان و خەوی لێ زڕاندوون؛ هەموو ئەوانەش کە ئاسۆی بیر و هزریان بستێک ئەولاوەتر لەو چوارچێوە و قاڵبە ناڕوا کە داگیرکەر بۆی دیارییکردوون، زات ناکەن باسی بکەن.

🔸پرسی کورد و کوردستان، چ وەک نەتەوە و نیشتمانێکی داگیر و پارچەپارچەکراو و چ وەک خۆ و دوژمن ناسین و پێناسەکردن و چ وەک ستراتیژ و ئامانج کە بریتییە لە رزگاریی نەتەوەیی و هەڵتەکاندن و هەڵگرتنی سەروەریی داگیرکەر بەسەر کوردستانەوە؛ پێش هەر شتێک پێویستیی بە بوێری و باسکردن هەیە.

🔸ئەوانەی چ لەبەر سەرلێشێواوی و تێنەگەیشتن لە پرسی کورد و کوردستان خۆ لە باسکردنی سەربەخۆیی دەبوێرن و چ ئەوانەی لەبەر راگرتنی دڵی برا ئیرونییەکانیان، بۆ جارێکیش نەیانوێراوە ناسنامەی ئێرانیبوون لەبەر خۆیان دادڕن و نەیانویستووە باس لەو مافە سروشتی و یاساییە بکەن کە بەهەموو پێوەرێک بۆ کورد رەوایە سەربەخۆ بێت و ببێتە خاوەنی دەوڵەتی خۆی؛ بێگومان هەوڵ دەدەن بایەخی سەربەخۆیی کەم بکەنەوە و باسکردنیشی بێبەها نیشان بدەن.

🔸سەربەخۆیی، باس کردن لەسەربەخۆیی، کارکردن بۆ سەربەخۆیی، تووڕدانی ناسنامەی ساختەی ئێرانیبوون و رەتکردنەوەی ئێرانییەت بوێری دەوێ و کاری هەرکەس و لایەنێک نییە.