ڕێککەوتنی سێکۆلاریسم و فێندەمێنتالیسم ( ژنراڵ مەزلووم کۆبانێ و ئەحمەد ئەلشەرع )

پێش 2 هەفتە

سەدیق دەروێشی

  🔹ڕێککەوتنی نێوان ژنراڵ مەزلووم عەبدی فەرماندەی هێزەکانی سوریەی دێمۆکرات و ئەحمەد ئەلشەرع سەرۆک کۆماری " سوریەی عەرەبی " ، ڕێککەوتنی دوو پاڕادایم و دوو جیهانبینی و دوو هرز و کلتووری جیاواز و، دوو ڕوانگەی پارادوکسیکال بۆ سیستەمی سیاسی سوریە و بۆ ئاواکردنی سوریەی دوای بنەماڵەی ئەسەد ، جێی تێڕامان و لێوردبوونەوەیە.
  🔸 سوریە وڵاتێکی دەستکردی کۆلۆنیالیزمی جیهانییە و کۆکەرەوەی چەند نەتەوەیەک و ئەتنیک و هەڵگرانی ئۆلی جیاوازە و ناکرێ ببێ بە سوریەی عەرەبی و بەشێک بێ لە مۆنۆپۆلی پێکهاتەی عەرەبی سوری. "سوریەی عەرەبی" هیچ جیاوازییەکی لە گەڵ دەورانی حوکمڕانیی بنەماڵەی ئەسەد نابێ و دەبێتە درێژەدەرێ ڕێچکەی بەشارەکان و  بەڵام بە پاڕادایم و ڕێبازی جیاوازەوە.
   🔹کۆماری دێمۆکراتیکی سوریە دەتوانی هەموو پێکهاتە نەتەوەیی و ئەتنیکییەکان بە مافی یەکسانەوە کۆبکاتەوە و مافە سیاسی و ئابووری و کۆمەڵایەتی و کولتوورییەکانی  هەموو نەتەوەکان و ئەتنیک و هەڵگرانی ئۆلی جیاواز لە ناوچەکانیاندا بپارێزێ و مافی داکۆکی کردن لە مافە جۆراوجۆرەکانیان پێ ببەخشێ.
  🔸لە دۆخی هەنووکەیی ناوچە و،  سناریۆکان و ئەگەرەکانی بەردەم داهاتووی ناوچەی خۆرهەڵاتی نێوەڕاست و بە لەبەرچاوگرتنی سیستەمی پێوەندییە نێودەوڵەتییە ناوچەیی و جیهانییەکان و ، لێکدانەوەی دەرفەت و هەڕەشەکانی بەردەم پرسی کورد، ڕێککەوتنەکەی مەزلووم /ئەحمەد دەرفەتێک بۆ کورد دەڕەخسێنێ تاکوو لە لایەک کورد  خۆی ڕێکباخەوە و نێو ماڵی خۆی یەکبخا و ، لەلایەکی دیکەوە بە ڕێگەی ئاشیانەی چارەی پرسی کورد بکا و بۆکورد دوانگەیەکی دیکە لە ناوچەدا بکاتەوە.
  🔹کورد نابێ هیچ دەرفەتێک لە دەست بدا ؛ دەرفەتەکان تێپەڕ و کورتخایەنن و درەنگ دەڕەخسێن و وەدەست دەکەون. بەڵام پێویستە بە بڕشت و وردبین و وریا بین و نابێ بە دوور لە عەقڵانییەت و ئاوەزمەندی و لە ڕووی سۆزدارییەوە بڕیار بدەین. بڕیارەکانی ئێستا چارنووسی دەیانساڵەمان دیاری دەکەن.
 🔸 ئەو ڕێککەوتنە کۆمەڵێک دەرفەت دەخاتە بەردەم کوردی ڕۆژئاوای کوردستان و دەبێ بە وریاییەوە هەنگاو بنێن و، لە سوریەی دوای بنەماڵەی بەشارەکان  مافە نەتەوەییەکانیان یاسامەند بکەن تا ئەو کاتەی دەرفەتێکی زێڕین دەڕەخسێ و کوردستان دەگاتە ڕاستینەی مێژوویی خۆی و دەبێتە وەڵاتێکی سەربەخۆ...

 🔹لەو دۆخەدا، پێویستە هەموومان هاوکار و پشتیوانی براکانمان لە ڕۆژئاوای کوردستان بین و یارمەتیدەریان بین و ، چونکە ئەوان باشتر لە ئێمە لە دۆخی خۆیان تێدەگەن!