ئەیمەن زەواهری سەرۆکی رێکخراوی القاعیدە لە ئەفغانستان کوژرا

02/08/2022

بەپێی راپۆرتی ئەسۆشەیتدپرێش لە ئەنجامی بۆردوومانی فڕۆکە بێ فڕۆکەوانەکانی ئەنجومەنی هەواڵگریی ئەمریکا لە ئەفغانستان، لە کۆتایی هەفتەی رابردوو ئەیمەن زەواهری سەرکردەی رێکخراوی تێرۆریستیی ئەلقاعیدە لە کابولی ئەفغانستان کوژراوە.
ئەمریکا دوای کشاندنەوەی هێزەکانی لە ئەفغانستان بەردەوام بووە لە چاودێریکردنی ورد بۆ دۆزینەوەی نیشانەیەک لە بوونی هێزەکانی ئەلقاعیدە لەو وڵاتە. پاش دۆزینەوەی هاوسەر و منداڵەکانی زەواهری و شوێنهەڵگرتنیان توانیویانە ئەیمەن زەواهری بدۆزنەوە.
بە گوێرەی زانیارییەکی ئاژانسی رۆیتەرز کەلە زاری چەند بەرپرسێکی ئەمریکاوە ئاماژەی پێکردووە گوایە "راهاتن و خووی راوەستانی زەواهری لە بەلەکۆنی ماڵەکەی یارمەتیدەر بووە بۆ دۆزینەوە و دڵنیا بوونەوە لە شوێنەکەی"
زەواهری لە ساڵی 2011 ـەوە و پاش کوژرانی بن لادەن، سەرکردایەتی قاعیدەی لە ئەستۆ بووە.