ڕاگەیەندراوی ژمارە( 89 )ی ڕاپەڕینی کوچک و بەردی رۆژهەڵاتی داگیرکراو "ڕاپەڕین تا ڕاماڵینی داگیرکەران لە نیشتمان"

21/11/2022

ڕاگەیەندراوی ژمارە( 89 )ی ڕاپەڕینی کوچک و بەردی رۆژهەڵاتی داگیرکراو
"ڕاپەڕین تا ڕاماڵینی داگیرکەران لە نیشتمان"

ئەمڕۆ ٣٠ خەزەڵوەر لە ٦٦ ـەمین رۆژی راپەڕینی رۆژهەڵاتی کوردستان‌دا رۆڵە راپەڕیوەکانی رۆژهەڵات درێژەیان بە راپەڕینی قارەمانانەیان دا.
ئەمڕۆ کچ و کوڕانی راپەڕیو لە زۆربەی شار و شارۆچکەکانی رۆژهەڵات، لە جوانڕۆ، پیرانشار، دێهلوڕان، سەقز، سنە، کامیاران، کرماشان، مەریوان، بۆکان، مەهاباد، روانسەر، تیکاب، دێولان، بانە، سەلاسی باوەجانی، ئیلام، ئیزە، سەردەشت؛ سەرەڕای میلیتاریزەکردنی شارەکان و پەلامار و تەقەی بێبەزەییانەی هێزەکانی دەوڵەت، لە گۆڕەپانەکاندا مانەوە و بەرپەرچی پەلامارەکانیان دایەوە و پارێزگارییان لە ڕاپەڕینی پڕشکۆیان کرد.
 راپەڕینی ئەمڕۆ لەجوانڕۆ، لەسەرگڵکۆی شەهیدانی دوێنێی راپەڕینی ئەو شارەوە دەستی پێکرد. خەڵکی تێکۆشەری جوانڕۆ لە رێوڕەسمی ئەسپەردەکردنی شەهیدانی دوێنێی راپەڕین‌دا یەک دەنگ و هاوهەنگاو بەشدارییان کرد و بە دروشمدانەوە لەوێوە بۆ سەر شەقام و کۆڵانەکان رۆشتن و گڕیان لە ئاڵای دەوڵەتی داگیرکەری ئێران بەردا و خاوەندارێتییان لە خوێنی شەهیدانی راپەڕین کرد. 
هێزەکانی دەوڵەتی داگیرکەری ئێران بە پەلامار و تەقەکردنی راستەوخۆیان لە خەڵکی راپەڕیو بە چەکی سوک و قورسەوە و بە هەستاندنی هەلیکۆپتەر بەسەر شاردا هەموو حەولی خۆیان بۆ بڵاوەپێکردن و سەرکوتکردنی کچان و کوڕانی راپەڕیو خستەگەڕ.
لە ئاکامی تەقەی راستەوخۆ و بێبەزەییانەی هێزەکانی دەوڵەت لەخەڵکی راپەڕیو، ژمارەیەکی زۆر لە خەڵکی راپەڕیو لە جوانڕۆ و شارەکانی دیکەی رۆژهەڵاتی کوردستان شەهید و برینداربوون؛ هێزەکانی بەرفەرمانی تاران بەمەوە نەوەستان و کەوتنە رفاندن، دەسبەسەرکردن و بێسەروشوێنکردنی بریندارنی راپەڕیو.
خەڵکی راپەڕیوی رۆژهەڵات لەبەرانبەر هێرش و پەلامارەکانی هێزەکانی دەوڵەتی داگیرکەر، بەرگریی رەوایان لەخۆیان کرد و بەرپەرچی پەلامار و توندوتیژییەکانی هێزەکانی ئێرانی داگیرکەریان دایەوە.

پارتی ئازادیی کوردستان PAK
کۆمیتەی راگەیاندن
٣٠ خەزەڵوەر ٢٧٢٢ک
٢١ نۆڤامبری ٢٠٢٢ز