وەڵامی وته‌بێژی PAK بە داوایه‌كی مامۆستا سەلاحەدین وەهابپوور بۆ یه‌كڕیزیی پارته‌ سیاسییه‌كانی ڕۆژهه‌ڵاتی كوردستان

23/02/2023

وەڵامی وته‌بێژی PAK بە داوایه‌كی مامۆستا سەلاحەدین وەهابپوور بۆ یه‌كڕیزیی پارته‌ سیاسییه‌كانی ڕۆژهه‌ڵاتی كوردستان

   لەدرێژەی هەوڵی چالاکانی سیاسیی و کەسایەتییەکانی ڕۆژهەڵاتی کوردستان، بۆ پێكهاتنی یەکڕێزییه‌ك لە نێوان پارت و لایەنە سیاسییەکانی ڕۆژهەڵاتی کوردستان؛ له‌ ڕۆژی جهانیی زمانی دایكییدا، مامۆستا سەلاحەدین وەهابپوور " له‌ داوایه‌كی دڵسۆزانه‌دا، پێشنیاری كردووه‌ هێزه‌ نه‌ته‌وه‌ییه‌كانی كوردستان له‌ سه‌ر بنه‌مای دوو ئه‌سڵی: نه‌ته‌وه‌ بوونی كورد و مافی دیارییكردنی چاره‌نووس، چوارچێوه‌ و پێكهاته‌یه‌كی نه‌ته‌وه‌یی پێكبێنن.
   پارتی ئازادیی کوردستان،وێڕای سپاس و پێزانین بۆ په‌رۆش و خەمخۆریی بەڕێزیان بۆ پرسی یه‌كڕیزی هێزه‌ سیاسییه‌كانی كوردستان، وه‌ك چۆن له‌ ڕابردوودا به‌ ده‌نگ هه‌موو داوا و بانگه‌وازه‌كانی له‌و چه‌شنه‌وه‌ هاتووه‌، پێشوازیی لەو  داوا برایانەیه‌ ده‌كات.هه‌روه‌ها پێ له‌سه‌ر ئه‌وه‌ داده‌گرێته‌وه‌‌ كه‌ نه‌ته‌وه‌كه‌مان خاوه‌نی مافێكی سیاسییه‌ كه‌ مه‌نشووری نه‌ته‌وه‌ یه‌كگرتووه‌كان و جاڕنامه‌ی جیهانیی مافه‌كانی مرۆڤ و كۆنوانسیۆنه‌كانی دیكه‌ی نه‌ته‌وه‌ یه‌كگرتووه‌كان بۆ هه‌موو نه‌ته‌وه‌یه‌كیان سه‌لماندووه كه‌ بریتییه‌ له‌ مافی دیاریی كردنی چاره‌نووس. پارتی ئازادیی كوردستان خه‌بات بۆ گه‌ڕاندنه‌وه‌ی ئه‌م مافه‌ زه‌وت كراوه‌ بۆ خه‌ڵكی كوردستان، به‌ بنه‌مای هه‌ر هاوپه‌یمانییه‌كی كوردستانی و مه‌رجی هاوكاریی له‌ گه‌ڵ هه‌ر لایه‌نێكی ده‌ره‌كیی داده‌نێت. 

وته‌بێژی پارتی ئازادیی كوردستان
خه‌لیل نادری

٤ی ڕه‌شه‌مه‌ی ٢٧٢٢ك
٢٣ی فێورییه‌ی٢٠٢٣ز