کوردایەتی و ئیرادەی ئازادیی و سەربەخۆیی لە سێدارەی داگیرکەر بەھێزترە

21/06/2023

 ئیرادەی ئازادیی و سەربەخۆیی لە سێدارەی داگیرکەر بەھێزترە

بەرەبەیانی ئەمڕۆ چوارشەممە ٣١ی جۆزەردان، دەوڵەتی داگیرکەری فارس، پاش یازدە ساڵ بەندکردن، سزای لەسێدارەدانی هێمن مستەفایی جێبەجێ کرد و هەر ئەمڕۆ تەرمی شەھیدی تازەی کوردستان، لە کانی دیناری مەریوان لە نێو ئاپۆڕەی خەڵک‌دا ئەسپەردەی خاک کرا.
ئەم تاوانە جیا لەوەی لە درێژەی هەموو ئەو کارەساتانەیە کە ئەو دەوڵەتە داگیرکەرە بە درێژایی تەمەنی بەسەر رۆڵەکانی ئەم نەتەوەیە و نیشتمانەکەی‌دا هێناوە؛ بەشێکە لە خولێکی نوێ لە پەلاماردانی کوردستان و بزاڤە ڕزگارییخوازییەکەی.
پارتی ئازادیی کوردستان لە سێدارەدانی هێمن مستەفایی بە نیشانەیەکی دیکە لە پێوەندیی نێوان دەوڵەتی داگیرکەر و نەتەوەیەکی بندەستی کۆڵۆنیکراو و ھاوکات بە خوێنبایی خۆڕاگری و خەباتی کورد لە پێناو ملنەدان، مانەوە و تێکۆشان بۆ ھەڵوەشاندنەوەی ئەو پێوەندیی و سیستەمە دەبینێ.
پارتی ئازادیی کوردستان پێداگریی لەسەر ئەو راستییە دەکاتەوە، تا سێبەری دەوڵەتی داگیرکەر بەهەر سیستەمێکەوە بەسەر کوردستانەوە بمێنێتەوە، پشکی کورد هەر کوشتن و بڕین و کاولکردنی نیشتمانەکەی دەبێت.
جێی خۆیەتی لەم کاتەدا، وێڕای مەحکووم کردنی تاوانی دژی مرۆڤی تاران، سیاسەتی سەوداکارانەی ئەو دەوڵەتانەش مەحکووم و ڕیسوا بکرێت کە لە حاست کوشتاری مرۆڤی کورد چاویان دەنووقێنن.

پارتی ئازادیی کوردستان PAK
کۆمیتەی راگەیاندن
٣١ جۆزەردان ٢٧٢٣ ک
٢١ ژووئەن ٢٠٢٣ ز