زیندانیی سیاسیی کورد هووشمەند عەلیپوور لە زیندانی سنە مانی لە خواردن گر

22/11/2021

هووشمەند عەلیپوور لە ڕۆژی سێشەممە ٢٥ی گەڵاڕێزانەوە بۆ دەربڕینی ناڕەزایی لە بەرامبەر دژایەتیکردنی ئیدارەی ئیتلاعات لەگەڵ داواکارییەکەیدا بۆ پێدانی پشووی کاتی (مورەخەسی) لە زیندانی ناوەندیی سنە مانی لە خواردن گرتووە.
بەپێی نامەیەکی لقی چواری ئیجرای ئەحکامی کەیفەریی سنە کە حەفتەی ڕابردوو لە زیندانی سنە بەم زیندانییە سیاسییە ڕاگەیەنراوە، داواکارییەکەی بۆ پێدانی پشووی کاتی (مورەخەسی) بە هۆکاری نادیار لە لایەن دادگاوە ڕەت کراوەتەوە. پێشتریش کە برا کۆڵبەرەکەی بە ناوی ژیان عەلیپوور لە ڕێکەوتی ٢٢ی ڕەزبەردا بە تەقەی هێزە سنوورپارێزەکان لە ناوچە سنوورییەکانی سەردەشت گیانی لەدەست دابوو، داواکاریی گشتیی سنە داواکارییەکەیی بۆ پێدانی پشووی کاتی بە مەبەستی بەشداریکردن لە ڕێوڕەسمی ئەسپەردەکردنی برا کوژراوەکەیدا ڕەت کردبۆوە.
جێگای ئاماژەیە دادگای هووشمەندی عەلیپوور بە تۆمەتی ئەندامبوونەوە لە پارتی ئازادیی کوردستاندا (پاک) لە ڕێکەوتی ١ی گەڵاڕێزانی ١٣٩٨ لە لقی یەکەمی دادگای شۆڕشی سنە بە سەرۆکایەتیی دادوەر سەعیدی بەڕێوە چوو. لە بەفرانباری هەمان ساڵدا دەرچوونی حوکمی لەسێدارەدان بۆ هووشمەند عەلیپوور ڕاگەیەنرا.
ئەم حوکمە لە خەرمانانی ساڵی ١٣٩٩دا لە دیوانی باڵای ئێران هەڵوەشایەوە و دۆسیەکە نێردرایە بەردەم لقی ٢ی دادگای شۆڕشی سنە. دادگای دووبارەی ئەم زیندانییە سیاسییە لە ڕێکەوتی ٣٠ی خەرمانانی ١٣٩٩ لە لقی ٢ی دادگای شۆڕشی سنە بەڕێوە چوو و ئەم جارە حوکمی ٨ ساڵ بەندکرانی بەسەردا سەپا.