مانگرتی گشتیی لە رۆژهەڵات بەبۆنەی لەسێدارەدانی زیندانیی سیاسیی کورد حەیدەر قوربانی

23/12/2021

ڕۆژی پێنج‌شەمە ٢ی بەرفرانباری ١٤٠٠ خەڵکی رۆژهەڵاتی کوردستان لە شارەکانی سنە، کامیاران و بانه لە ناڕەزایەتییەک مەدەنی بە بۆنەی لە سێدارەدانی زیندانی سیاسیی کورد، حەیدەر قوربانی، دەستیان دایە مانگرتنی گشتی.
 لە سوشیال میدیاکان کۆمەڵێک وێنە لە شاری سنە بڵاو کراووە کە نیشانی دەدات کاسبکارانی ئەم شارە بە شێوەیەکی بەرین لەم مانگرتنەکەدا بەشدارییان کردووە و دووکانەکانیان داخستووە هاوکات  هاوشێوەی سنە بازاڕەکانی شارەکانی بۆکان، بانه و نەغەدە لەم مانگرتنە بەشدار بوونە و بە پێ هەواڵەکان، هێزە ئەمنییەتییەکان دۆخێکی ئەمنییەتیی تووند و سەربازییان لە شاری کامیاران‌دا زاڵ کردووە.
مانگرتنی گشتی لە رۆژهەڵاتی کوردستان دوای ڕاگەیەندراوی چالاکانی مەدەنیی کورد لە ڕۆژی سێ‌شەمە ٣٠ی سەرماوەز بەڕێوەچووە کە تێدا داوا لە خەڵکی ڕۆژهەڵاتی کوردستان کرابوو بۆ مەحکووم‌کردنی لەسێدارەدانی حەیدەر قوربانی و ناڕەزایەتی بەرامبەر بە سیاسەتی "ئینکار، سەرکوت و تۆقاندنی کۆماری ئیسلامی" ڕۆژی پێنج‌شەمە لە ماڵەکانیان نەچنە دەرەوە و خۆیان لە کردنەوەی دووکان و بازاڕەکانیان ببوێرن.
لەم ڕاگەیندراوەدا جگە لە ئاماژەدان بە دەرکردنی بڕیاری سزای سێدارە بۆ چند زیندانی سیاسیی‌ کوردی دیکە هاتبوو کە "ئێمە دەتوانین بەم جۆرە مانگرتنە، کاریگەریمان هەبێت لەسەر هەڵوەشاندنەوە و کەم‌کردنەوەی سزای ناڕەوا بە دژی ئەم زیندانیە سیاسییانە."
حەیدەر قوربانی ڕۆژی یەک‌شەمە ٢٨ی سەرماوەز بە شێوەیەکی نهێنی و بەبێ مافی دوایین دیدار لەگەڵ بنەماڵەکەی‌دا، لە زیندانی ناوەندیی سنە لە سێدارە درا.
ئەوڕۆ کارناسانی مافی مرۆڤی نەتەوە یەک‌گرتووەکان لە ڕاگەیندراوێک‌دا لەسێدارەدانی حەیدەر قوربانی بە دەستی کۆماری ئیسلامیی بە تووندترین شێوە مەحکووم کردووە.
کارناسانی مافی مرۆڤی نەتەوە یەکگرتووەکان لە ڕاگەیندراوەکەی خۆیان‌دا ڕایانگەیاندووە لە سێدارەدانی حەیدەر قوربانی "لادانێکی زەق و ئاشکرای ئێرانە لە بەڵێنەکانی لە چوارچێوەی یاسا نێونەتەوەییەکانی مافی مرۆڤ‌دا."
کارناسانی مافی مرۆڤی نەتەوە یەکگرتووەکان سەرباری بە سەقەت‌زانینی ڕەوتی دادوەری سەبارەت بە تۆمەتەکان دژی حەیدەر قوربانی، وتوویانە بڕیاری سزای سێدارەیش بە شێوەیەی نهێنی و لە کاتێک‌دا جێبەجێکراوە، کە ڕەوتی لێکۆڵینەوەی دادوەری بۆ داخوازیی پێداچوونەوەکەی کۆتایی پێ‌نەهاتبوو.
لە ڕاگەیندراوەکەی کارناسانی مافی مرۆڤی نەتەوە یەکگرتووەکان‌دا هاتووە: "ئێمە زۆر بەداخەوەین لەمەی کە بەرپرسانی ئێران سەرباری داخوازییە بەردەوامەکانی نێمە بڕیارن‌دا سزای لە سێدارەدانی بەڕێز قوربانی جێبەجێ بکەن."