مەجلیسی گشتیی پارتی ئازادیی کوردستانPAK کۆبووەوە

27/03/2022

مەجلیسی گشتیی پارتی ئازادیی کوردستانPAK کۆبووەوە

    لە ڕۆژانی تێوەڕسووڕانی ساڵی کوردیی و گەڕانەوەی نەورۆز ، مەجلیسی گشتیی پارتی ئازادیی کوردستان بە بەشداریی زۆربەی ئەندامانی؛ کۆبوونەوەی ئاسایی خۆی بەڕێوە برد. کۆبوونەوەکە دوو تەوەری سەرەکیی خستە بەر باس و گفتووگۆ کە بریتیی بوون لە:
١- پەلاماری ڕووسیا بۆ داگیرکردنی ئۆکراین: هۆکار، ئەگەر و ئاکامەکان و کاریگەریی لە سەر کوردستان.
٢- پەلاماری ڕۆکێتی ئێران بۆ سەر هەولێر : هۆکار، ئەگەر و ئاکامەکانی لە سەر باشووری کوردستان و حکوومەتی هەرێم.
مەجلیسی گشتییPAK پاش لێکدانەوەی تێر و تەسەلی هەر کام لەو تەوەرانەو هێندێک بابەتی پەڕاوێز و پێوەندییدار، بڕیار و ڕاسپاردەی پێویستی دەکرد.
مەجلیسی گشتی پارتی ئازادیی کوردستان، وەک هەمیشە بە باوەڕ بەخۆبوونەوە، بۆ ڕووبەڕوو بوونەوەی هەڕەشەکان و کەڵکوەرگرتن لە دەرفەتەکان لە هەموو ئاستەکانی نەتەوەیی، حیزبی و لەشکریی، پێی لەسەر گیانی خۆڕاگری و کۆڵنەدان و بەرەنگاریی داگرت. هەروەها هەبوونی یەکڕیزی و یەکێتی کوردستانیانی لە هەموو ئاست و بەستێنەکاندا بە مەرجی پاراستنی دەسکەوتەکان و بەرەنگاربوونەوەی هەڕەشەکان و قۆستنەوەی دەرفەتەکان دانا.
مەجلیسی گشتیی پارتی ئازادیی کوردستان، بە ئاماژە بە  گەشە و پەرەسەندنی هێڵ و ڕێبازی ناسیۆنالیزمی ئازادیبەخشیی کوردی و تەسدانەوەی ئایدۆلۆژیا هاوردەکان و ڕەوت و هێڵی ئێرانچێیتی لە ڕۆژهەڵاتی داگیرکراو؛ شانازیی و سەربەرزیی خۆی بە بەرهەم و ئاکامەکانی خەباتی ٣٠ ساڵەی پارتی ئازادیی کوردستان وەک پێشەنگ و ئاڵاهەڵگری ئەو هێڵ و  خەبات و تێکۆشانە دەربڕی و پێی لەسەر سەرخستنی ئەم ڕێبازە لە ئاستی گوتاریی و مەیدانییدا داگرت و سڵاوی نارد بۆ ڕێبەری شەهید سەعید یەزدانپەنا و سەرجەم شەهیدانی ڕێبازی سەربەخۆیی و بەدەوڵەتبوونی کوردستان. هەروەها سڵاوی خۆڕاگری و کۆڵنەدانی پێشکەشی خەباتگێڕانی ڕیزەکانی پارتی ئازادیی کوردستان و فەرماندە و پێشمەرگەکانی سپای میللیی کوردستان کرد.

پارتی ئازادیی کوردستان PAK
کۆمیتەی ڕاگەیاندن

نەورۆزی ٢٧٢٢ک