نان لە ئێران بە کۆدی میللی دەفرۆشرێت

04/05/2022

بەپێی هێندێک راپۆرت لە ئێران، لەگەڵ ئازادکردنی نرخی گەنم و ئارد و هاوکات بەرزبوونەوەی بەرچاوی نرخی نان، کاربەدەستێکی باڵای وەزارەتی دارایی رایگەیاندووە کە نان بەشێوەی دیاریکردنی بەش و بە کۆدی میللی دەفرۆشرێت.
ئیبراهیم سیامی، بەڕێوەبەری بنیاتنانی داهاتوو، مۆدێل سازی و بەڕێوەبەری وئیتلاعاتی ئابووری وەزارەتی دارایی، رۆژی چوارشەممە ١٤ گوڵان سەبارەت بە ناوەڕۆکی ئەم بەرنامەیە گوتی: بۆ هەر کۆدێکی میللی یارانە نان دیاری دەکرێ. خەڵک لەکاتی کڕینی نان، بەهەمان نرخی پێشوو پارە دەدەن و ماباقی پارەکە، دەوڵەت دەیدات.
بەگوتەی ئەو: باشەی ئەم رێکارە ئەوەیە کە کەسانێک کە نانی زۆرتر بەکار دێنن، یان دەبێ کەمی بکەنەوە یانیش دەبێت بە نرخی ئازاد بیکڕن.
بەپێی لیستێکی تازە کە بڵاوکرایەوە لە رایگەیاندنەکاندا، ئەوە نیشان دەدات کە نانێک کە پێش چەند رۆژێک بە سێ هەزار تمەن بووە، ئێستا بووە بە دە هەزار تمەن.
شایانی باسە کە لە ئێران قاچاخچییەکان لە هەموو بوارەکان بەگشتی و ئێستا کە قەیرانی ئارد لە ئارادایە، کاربەدەستانی تارانن بەگشتی و سپای پاسداران بەتایبەتین و هەر رۆژی بەشێوەیەک باری سەرشانی خەڵک قورستر دەکەن.