پەیامی خاتوو لەیلا دیوبەند ئەندامی بەڕێوەبەریی رێکخراوی ئازادیی ژنانی کوردستان- نینا بە بۆنەی 30 گوڵان، 31ساڵەی دامەزرانی پارتی ئازادیی کوردستان:

19/05/2022

خۆشحاڵم بە بۆنەی 30 گوڵان، سی و یەکەمین ساڵوەگەڕی دامەزران و راگەیاندنی پارتی ئازادیی کوردستان و هەروەها دووهەمین ساڵیادی بنیادنانی سوپای میللی کوردستان، گەرمترین پیرۆزبایی لە گشت هاوڕێ و  هاوسەنگەرانم لە پارتی ئازادیی کوردستان بەگشتی و ژنان و کچانی ریزەکانی سوپای مییلی و تەوارەکانی ئازادیی کوردستان بە تایبەتی ئەکەم. 
هەر لەم بۆنە پیرۆزەدا بە ئەرکی ئەزانم سەری رێز و وەفاداری بۆ سەرجەم شەهیدانی رێگای رزگاریی یەکجاریی و سەربەخۆیی و بەدەوڵەتبوون و سەرقافڵەی شەهیدانی پارتی ئازادیی کوردستان کاک سەعید یەزدانپەنا دانەوێنم و هەزاران سڵاوی نەمریی و هەرمان پێشکەشی رۆحی بەرزەفڕیان بکەم.
دامەزران و بنیادنانی پارتی ئازادیی کوردستان هەنگاو و بڕیاڕێکی ژیرانە و بوێرانەی کۆمەڵێک لاوی خوێنگەرمی نەتەوەکەمان بوو کە بە هاتنە مەیدانی توانی تەنگ بە هەموو ئەو تێئۆری و چەمک و دەستەواژە سیاسیانە هەڵچنێ کە ساڵانێکی زۆر بوو ئەدەبیاتی سیاسیی بزووتنەوی رزگاریخوازیی رۆژهەڵاتی کوردستانی لە ژێر ناو و بیانووی جۆراوجۆردا قورخ کردبوو. بە دامەزران و پاشان وەسەرپێکەوتن و گەشەی PAK هێڵکی فیکری نوێی تەواو کوردستانی کە ئیلهامی لە پێشەوایانی فکری و سیاسی نەتەوەکەمان وەرگرتبوو، پێی نایە گۆرەپانی بزووتنەوەی رزگاریخوازی رۆژهەڵاتی کوردستان و  کۆمەڵێک گۆرانکاریی لە ستراتیژی و ناوەرۆکی خەباتکارانەی بزووتنەوەکەدا پێکهێنا. لە جێی ئامانجی خودموختاری سەربەخۆیی و لە جێی ئێرانچێتی کوردستانی بوون و لە بری درووشمەکانی هاوپشتی بۆ ئازادیی و یەکسانی لە ئێران چەمکی بەرەی کوردستانی و هاوپشتی نەتەوەیی و لە باتی تراویلکەی دیموکراتیزەکردنی ئێران حەولدان بۆ رزگاریی یەکجاریی کردە ئالترناتیوی خەباتێکی رەوای نەتەوەیی کە نەک هەر خوێن و قوربانییەکانی ناچنە خزمەتی ئامانجی داگیرکەرانی کوردستان، بەڵکوو رۆژ لە دوای رۆژ کورد و نەتەوەکەمان لە ئامانجەکانی نزیکتر ئەکاتەوە.
لە سی و یەکەمین ساڵوەگەری دامەزرانی پارتی ئازادیی کوردستاندا خەباتگێڕانی ریزەکانی زیاتر لە هەموو کاتێک سوورن لە سەر درێژەدان بە رێگە و رێبازەکەیان کە راماڵینی داگیرکەرانە لە سەر خاکی کوردستان و راگەیاندنی سەربەخۆیی و دەوڵەتی جمهوری کوردستانە.