🔶پەیامی سەرۆکیPAK بە بۆنەی ٣١هەمین ساڵوەگەڕی دامەزراندنی پارتی ئازادیی کوردستان.

23/05/2022

🔶 بۆنەی 31هەمین ساڵوەگەڕی دامەزراندنی پارتی ئازادیی کوردستان:

بە ناوی خوای گەورە ودلۆڤان

ڕۆڵەکانی نەتەوەی کورد!
کوردستانییە وڵات پارێزەکان!
ئەندامان،تێکۆشەران و خەباتگێڕانی ڕێزەکانی پارتی ئازادیی کوردستان!
تیپەکانی سپای میللیی کوردستان!
بنەماڵەی سەربەرزی شەهیدان!
     بەسڵاوێکی گەرمەوە ٣١هەمین ساڵوەگەڕی دامەزراندنی  پارتی ئازادیی کوردستان ودووهەمین ساڵی پێکهێنانی سپای میللیی کوردستان لەهەموولایەکتان  پیرۆزدەکەم .
پارتی ئازادیی کوردستان پێی نایە ٣١هەمین ساڵی خەباتییەوە. لەماوەی ئەو٣١ ساڵەدا لە قۆناخە جیاجیا کاندا پارتی ئازادیی کوردستان وەکی پاڕتێکی سیاسیی وپاڕتێکی لەشکری خاوەن پێشمەرگە، دەوری گرینگ وئازایانە  وهەندێک جاریش کەم وێنەی لەسەر گۆڕەپانی بەرەنگاربوونەوەی هێزەداگیرکەرەکانی بەرفەرمانی تاران لەکوردستان، بینیوە. هەروەها پارتی ئازادیی کوردستان سەروەری وشانازیی  ئەوەی بۆخۆی و بۆ ڕۆژهەڵاتی داگیرکراو تۆمار کرد کە شانبەشانی هێزەکانی پێشمەرگەی باشووری کوردستان بەرەنگاری تێرۆرستانی داعش ببێتەوە و لەتێکشکاندن و پاشەکشە پێکردن و دەرپەڕاندنیان لەسەرخاکی کوردستان دەوری کارابگێڕێت ولەم پێناوەش دا پۆلێک لەباشترین فەرماندەوپێشمەرگەکانی گیانیان بەخت کرد. هەروەها نەبەردی مێژوویی پردێ و ڕۆڵی پارتی ئازادیی کوردستان وهێزەکانی لەو کار و دەور و بیرەوەریانەن کەچوونەتە ناو مێژووی کوردستانەوە و هەرگیز لەیاد ناکرێن.
ئەمڕۆ لەم بۆنەیەدا لێرەوە سڵاو دەنێرم بۆ ڕۆحی پاکی ڕێبەری شەهیدمان کاک سەعیدی یەزدانپەنا و هەموو شەهیدانی قۆناغە جیاجیاکانی کاروانی٣١ساڵەی خەباتی پارتی ئازادیی کوردستان.
     بەڵام حەقیقەتێکیش هەیە پێویستە هەموو لایەک بیزانن. ئەویش ئەوەیەکە پارتی ئازادیی کوردستان لەگەڵ هەموو ئەو سەروەرییانەو لەگەڵ ئەو دەورە گرینگەی کە وەک پاڕتێکی سیاسیی و پاڕتێکی خاوەن پێشمەرگە گێڕاویەتی تەنیا پاڕتێکی سیاسیی و لەشکریی ئاسایی نەبووە؛ بەڵکوو PAK خاوەنی بیر و فەلسەفەی سیاسیشە. بە وتەیەکیتر پارتی ئازادیی کوردستان لەخەبات وتێکۆشانی خۆیدا بیر وفەلسەفەی سیاسی، بە بیر و فەلسەفەی هەتا ئێستایی یان بڵێین تا ئەو کاتی بزاڤی سیاسی ڕۆژهەڵاتی کوردستان و لە هەندێک خاڵدا بگرە سەرجەم کوردستانیش زیاد کردووە. یەکێ لەوبابەتانەی کە شانازییەکەی بۆپارتی ئازادیی وڕێبەری شەهیدمان کاک سەعید دەگەڕێتەوەپرسی ناسنامەیە.کاتێک کە پارتی ئازادیی کوردستان ٣١`ساڵ لەمەوبەر دامەزرا ناسنامەی چەسپاوی بێ ئەملاو ئەولا لە ڕۆژهەڵاتی کوردستان چ لەئاستی تاک چ لەئاستی نەتەوە چ لەئاستی بزاڤی سیاسی دا ئێرانیبوون بوو.هەموو لایەک قەبووڵیان کردبوو کە ئێرانین، ئەم بە ئێرانیی کردنە هەر لە هاتنەسەر کاری پەهلەوی یەکەمەوە کاری چڕوپڕ و ئاکادیمی بۆکرا، دەیان پڕۆژەی نووسین و ڕۆشنبیریی وکۆمەڵایەتیی وکەلتووریی وئابووری بۆ تەرخان کرا، بۆئەوەی نەتەوەی کورد بەئێرانیی بکرێت، ناسنامەکەی بەئێرانیی بکرێت وبزاڤە سیاسییەکەشی هەر ئەو ناسنامەیە هەڵگرت .
    پاش دەیان ساڵ لەو ناسنامە ساختەیە،لاوێکی تەمەن ٢٧ساڵەی وەک کاک سەعیدی یەزدانپەنا سەرنجی دایە سەر ئەو بابەتە و پرسی ناسنامەی کوردبوون یان ئێرانیبوونی ورووژاند. ناسنامەی ئێرانیبوونی ڕەت کردەوە و پێی لە سەر ناسنامەی کوردستانیبوون داگرت .ناسنامە بۆهەر تاک و نەتەوەیەک گرینگی وتایبەتی هەیە.گرینگترین ناسنامە، ناسنامەی نەتەوەییە. کاتێک ناسنامەی نەتەوەیی جەعل و تەزویربکرێت، یان ناسنامەیەکی ناڕاست بکرێت بە بەر نەتەوەیەکدا ئەو نەتەوەیە تووشی قەیرانی جۆراوجۆر دەبێت.تەنانەت کاریگەریی لەسەر باری دەروونی تاکەکانی ئەونەتەوەیە دادەنێت. بەکوورتی ناسنامە: بیرە، ڕۆحە،دەروونە، بەرژەوەندیی وچارەنووسی نەتەوەیەکە .جێی خۆشحاڵییەکە تابۆی ئێرانیبوونمان شکاند و ئەمڕۆ ئیتر ئێرانیبوون بۆ زۆربەی خەڵکی ڕۆژهەڵاتی کوردستان بەگشتی و بەتایبەت نۆخبە و دەستەبژێری کورد نەک شانازیی نییە، بەڵکوو ڕەت دەکرێتەوە و تووڕ دراوە. ئێمە هاوکات سەرنج وکاری زۆرمان کرد بۆ ناسینی دووژمنەکەشمان. پارتی ئازادیی کوردستان بوو بۆ یەکەمجار ئەو بابەتەی ورووژاند کە نەتەوەیەک بەناوی »نەتەوەی ئێران» بوونی نییە و ئەوەی هەیە دەوڵەتی فارسە و هەندێک جاریش بەهۆی تایبەتمەندیەکانییەوە بە ئێمپراتووری  فارس پێناسەی دەکەین. ئەو دەوڵەتە لەسەر بنەمای ئیتنیکی فارس، زبانی فارسی ،دین ومەزهەب وکەلتوور و مێژووی فارس دامەزراوە.بۆیە هەڵگرتنی پێناسەی ئێرانیی، فێڵێک بوو کە لە نەتەوە بندەستەکانی ئەو دەوڵەتە کرا. هەر بۆیە سەرووی ٩٠ساڵ لەمەوبەر وەزیری دەرەوەی دەوڵەتی ڕەزاشا بەنامەیەکدا داوا لەکۆمەڵەی گەلان دەکات کەچیتر ئەوان وەک دەوڵەتی فارس نەناسن، بەڵکوو وەکوو دەوڵەتی ئێرانی بناسن. ئەمرۆ دیسان جێی خۆشحاڵییەکە ڕۆژلەگەڵ ڕۆژ ناسنامە و ناوەڕۆک وچییەتی ئەو دەوڵەتە بەباشی دەناسرێت و ڕۆژبەڕۆژ ڕۆڵەکانی نەتەوەکەمان لەوەهمی ئێرانیبوون وبەئێرانی پێناسەکردنی ئەودەوڵەتەش دێنەدەرێ؛ خۆیان بەکورد دەزانن و دووژمنەکەش بەدەوڵەتی داگیرکەری فارس.    
     هەرلەسەروەرییەکانی داهێنانی بیر وفەلسەفەی سیاسی پارتی ئازادیی  کوردستان پرسی «دیپلۆماسی نەتەوەی»یە. ڕێبەری شەهید کاک سەعید یەزدانپەنا لەیەکەم نامیلکە کانیدا بۆ شیی کردنەوەی ئامانج وسیاسەت وهەڵوێستەکانی ئەودەمەی پارتی ئازادیی کوردستان، وەکی قۆناخی بنیاتنان نووسی، لەو کاتەدا ڕوانگەیەکی ڕوون لە نێو بزووتنەوەی سیاسیدا بۆ جۆری پەیوەندییەکان لەگەڵ دەرەوە نەبوو، یان بەوتەیەکیتر بڵێم لەکاتێکدا ڕوانگەکە نەتەوەیی نەبوو و لەسەربنەمای بەرژەوەندییەکانی نەتەوەیی کورد دانەندرابوو بەڵکوو بەفاکتەر و پێوەریتر باس لەپەیوەندیی دەرەکیی دەکرا و هەر وەها ئەوپەیوەندییانەی کەهەبوون لەسەر ئەوبنەمایانە دامەزرابوو؛ کاک سەعید چەمکی «دیپلۆماسی نەتەوەیی» هێنایە گۆڕێ. دیپلۆماسییەک لە سەر بنەمای بەرژەوندییەکانی نەتەوەیی کورد نەک لە سەربنەمای چییەتی وناسنامە و جۆری دەوڵەتەکان. بەڵام هەرلەوکاتەشدا سنوورێکی کێشا کە ئەودیپلۆماسییە نەتەوەییە، ئەودەوڵەتانە ناگرێتەوە کەسیاسەتی ئاپارتایدیان هەیە. زۆری نەخایاند کە دیپلۆماسی کورد لەلایەن حیزبەکان وتەنانەت تاک وگرووپەکانەوە بەکردەوە بەوجۆرە چووە پێشێ. واتە ئیتر ئەو سنوورە چینایەتی وخوێندنەوە مارکسیستییە لەسەر دۆخی جیهان نەما کە تەنیا لەبەر ئایدئۆ لۆژیا یان بڵێن بە پێوەری ئایدۆلۆژیا دۆست ودوژمن بۆدۆزی کورد دیاری بکرێت.
   هەرلەقۆناخی دامەزراندندا بێجگەلە بابەتی ناسنامە و دیپلۆماسی نەتەوەیی، ڕێبەری شەهیدمان چەمکی بەرەی کوردستانی هێناگۆڕێ. ئەوە لەو کاتەدا بوو کە لەو سەردەمەدا بزووتنەوەی سیاسی کورد لەڕۆژهەڵاتی کوردستان کە بەسەر دوو بەرەدا دابەشکرابوو لایەکیان هەڵگری بیرۆکەی« بەرەی دیموکراتیکی دژی ئێمپریالیستی ئێرانیی» بوو، لایەکەی دیکە هەڵگری «کۆمۆنیزمی کرێکاری» بوو . چەمکی بەرەی کوردستانی و بیری بەرەی کوردستانی لەسەر بنەمای ئەوە داندراوە کە لەدەزگای فکری پارتی ئازادیی کوردستاندا بابەتی سەرەکی نەتەوەیە، ئەکتۆری سەرەکی نەتەوەیە.بۆیە بۆ ڕزگاریی خاک و بۆ گەیشتن بە سەروەری وسەربەخۆیی نەتەوەیی، هەموو چین وتوێژ و کەرتەکانی نەتەوە دەبێت وەک یەکەیەکی یەکگرتوو بەرامبەر دەوڵەتی داگیرکەر یەک بگرن. ئەوە لەئاستی سیاسیدا خۆی لە ڕێکاری دامەزراندنی بەرەیەکی یەکگروویی کوردستانییدا دەبینێتەوە.
    لەگەڵ گەشەی ساڵ بەساڵی پارتی ئازادیی کوردستان وگەشەی بیر و فەلسەفەی سیاسیی لەم پاڕتەدا پرسی دەوڵەت وسەربەخۆیی بووە بابەتی سەرەکی بیروفەلسەفەی پارتی ئازادیی کوردستان. لە ڕوانگەی ئێمەدا هەموو ئەو بەهایانەی کە مرۆڤ بیری لێدەکاتەوە یان داهێندراون و هەموو ئەئامانجانەی کە بۆ مرۆڤ پێویست و پیرۆزن، لە چوارچێوەی دەوڵەتدا دەتوانن وەدیی بێن، لە چوارچێوەی دەوڵەتی نەتەوەییدا. ئەزموونیش ئەوە بە ئێمە دەڵێت نەک هەر تیۆری سیاسیی. لە کۆنفڕانسی ڤێستڤالیا بەم لاوە هەموو پێشکەوتنەکان چ  پێشکەوتنی گشتیی نەتەوەیەک چ پێشکەوتنەکانی چین وتوێژ وکەرتەکانی ناو یەک نەتەوە تەنیا لە چوار چێوەی دەوڵەتی نەتەوەییدا وەدیی هاتوون.وەک مافی کرێکاران، مافی ژن، مافی منداڵ، ژینگەپارێزی،ئازادیی ودیموکڕاسی. بۆیە لە بیروفەلسەفەی سیاسی پارتی ئازادیی کوردستاندا دەوڵەت لەناوەندی سەرنجی ئێمەدایە و لەسەر ئەو باوەڕەین کەهەموو ئامانج وئاوات وبەهاکان تەنیادەتوانێت لەنێو دەوڵەت داپێک بێت. ئامانجەکانی ئازادیی ،دادپەروەریی، ئاسایش، یەکسانی، ژینگەپارێزی ، مافی منداڵ ، مافی بەساڵاچوو، بەدەر لە دەوڵەتی نەتەوەیی لە هیچ قووتابخانەیەکی فکری یان هیچ سیستەمێکی وەکوو مارکسیزم ،لیبڕالیزم،ئیسلامی سیاسی، دیموکڕاتیزەکردنی دەوڵەتی داگیرکەر،سۆسیالیزمی دیموکڕاتیک،کۆنفیدڕالیزمی دیموکڕاتیک،مافی شارومەندی، هیچیان ناتوانن ماف وئازادیی و بەختەوەریی و ئۆقرە بۆ نەتەوەیەک دابین بکەن. هەموو ئەوانە تەنیا لە چوارچێوەی دەوڵەتی نەتەوەییدا، دەتوانن وەدیی بێن .
     هەروەها پارتی ئازادیی کوردستان سەرنجێکی تایبەتی داوەتە سەرپرسی ژێئۆپۆلۆتیکی ڕۆژهەڵاتی کوردستان. لەدوای نەمانی دەوڵەتی قاجار و پێکهاتنی دەوڵەت- نەتەوەی بەناو مۆدێڕنی ئێران، پەهلەوی یەکەم وپەهلەوی دووهەم، خومەینی وخامنەیی وسیستمەکەیان واتە جمهووری ئیسلامی هەموویان لەسەر بەڕێوەبردنی سیاسەتی وردکردن وهاڕینی نەتەوەی ئێمە لەسەر یەک هێڵ چوون. لە سەردەمی پەهلەوی یەکەمدا خاک و نەتەوەکەمان سەرەتا لە چوارچێوەی دوو پارێزگادا لەڕووی کارگێڕییەوە دابەش کرا بوو. بەتێپەڕینی کات بۆ وردکردنەوە یان ئەتۆمیزەکردنی نەتەوەی کورد وهاڕین وپێشێل کردن ولەناوبردنی، دەست کرا بە پارچەپارچەکردن بەسەرچەند پارێزگای دیکەدا و سەرەنجام ئێستا نەتەوەی ئێمە لەڕۆژهەڵاتی کوردستان لەماکۆوە هەت یاسووج بەسەر ٨ پارێزگادا لەسەرخاکی خۆی دابەشکراوە. هەر وەها بەسەر چەند پارێزگای دەرەوی خاکی کوردستانیش وەکوو فارس و ئیسفەهان ومەرکەزی دا دابەش کراوە. ئەم پارچەپارچەکردن و ئەتۆمیزە کردنە هەتا دێت زیاتر پەرە دەستێنێت.بۆیە ئەوە مەترسییەکی گەورەی لەسەر ناسنامە و یەکێتی نەتەوەیی ئێمە پێکهێناوە. لە ڕوانگەی  ئێمەوە  پێویستە ڕۆڵەکانی نەتەوەکەمان  لەهەموو ئەو جووغرافیایەدا بەرانبەر ئەم سیاسەتی وردکردن وهاڕینە ڕابوەستن وبەرەنگاری ببنەوە.
    هەر لێرەوە بە دەرفەتی دەزانم داوا لە خوشک وبرایانی لۆڕ ولەک وبەختیاریم بکەم کەجارێک بۆ هەمیشە خۆیان لەناسنامەی دەوڵەتی فارس کەبەناوی ئێرانیبوونەوە خۆی سەپاندووە، دابماڵن ئێوە و ئێمە هەموو پێکهاتەکانی نەتەوەیەکین. ئێمە پاش ماوەکانی دەوڵەتی مادین. ئێمە هەموومان، هەموو پێکهاتەکانی کرمانج ومووکریانی و ئەردەڵانی و هەورامی و لەک و بەختیاری و لۆڕ و کەلهوڕ ، خاوەنی یەک ڕەچەڵەکین. ئەوە پڕۆسەی داگیرکاری وئاسمیلاسیۆن وئەتۆمیزە کردنی دەوڵەتی ئێرانە کە بە ڕادەیەک ئێمەی لەیەک دابڕاندووە وتووشی قەیرانی نەتەوەیی کردووین. کاتی ئەوە هاتووە ئێمە دەست بخەینەوە ناو دەستی یەک وپشت بەپشتی یەکتر بدەین بۆ ئەوەی بەرانبەر هەم پیلانگێڕییەکانی دەوڵەتی داگیرکەری فارس ڕابوەستین، هەم بەرانبەر هەڕەشەی فاشیزمی تورک.      
      لەنیشتمان و وڵاتێکی سەربەخۆی خۆماندا هیچ زاراوەیەک بەسەر زاراوەیەکی دیکەدا زاڵ ناکرێت، هیچ دین ومەزهەبێک بەسەر دین ومەزهەبێکی دیکەدا سەردار ناکرێت، هەموو پێکهاتەکانی نەتەوە گەورەکەمان بەشێکی ڕەسەن وجیانەکراون لەنەتەوەیەکی گەورە. هەرپێکهاتەیەک زاراوەی خۆی ڕێزی لێ دەگیرێت ،ڕێز لە ئایینی دەگیرێت، ڕێز لە مەزهەبی دەگیرێت. هاوکات یەک زمانی یەکگرتوو پێکدێنین،  زمانێکی یەکگرتووی دەوڵەمەندی پێکهاتوو لە هەموو زاراوەکانی پێکهاتەکانی ڕۆژهەڵاتی کوردستان لە یاسووجەوە هەتا کوو ماکۆ. بۆیە وەک عاشق وئەویندارێکی نەتەوە و نیشتمان و ڕزگاریی خاک و سەربەخۆیی وبەدەوڵەتبوونی کوردستان، داواتان لێدەکەم دەست لە دەمارگرژیی خێڵەکی و ناوچەیی هەڵگرن و هەموو پێکەوە وەکوو یەک نەتەوە خۆمان ببینین. یەک نەتەوەی یەکگرتوو کە دەتوانین بەرانبەر هەموو هەڕەشەکان ڕابوەستین. ئەگەر بێتوو پشت بەپشتی یەکەوە نەدەین،ئەگەربێتووە کوو یەک نەتەوە دەرنەکەوین، ناتوانین قووڵایی ئیستراتیژیکی یەکتربین. قووڵایی ئیستراتیژیکمان نابێت ودووژمنەکانی ئێمە بە ئاسانی پەڕتمان دەکەن و بە سەرماندا زاڵ دەبن. هیوادار و ئاواتەخوازم هەموو ئەو پێکهاتانەی ناوم بردن، لەبناری شاخە سەرکەشەکانی کوردستان  پێکەوە وەکوو یەک نەتەوە بێینەوە ناو مێژوو  و جارێکی دیکە پێکەوە بگەینە ئەو ئاستەی کە کاتی خۆی باپیرە گەورەکانی ئێمە لە دەوڵەتی ماددا گەیشتبوون .
     خوشک و برایانی ئازیز، کوردستانییە نیشتمانپەروەرەکان؛ تێکۆشەرانی ڕێگای ڕزگاریی و سەربەخۆیی کوردستان؛  پارتی ئازادیی کوردستان لەڕووی قەوارە وستراکچێریشەوە خاوەنی دەسکەوتە. پارتی ئازادیی کوردستان بەو دیسیپلینەوە کە لە ڕۆژی یەکەمەوە لە ڕێکخستنی دا هەیبووە توانی لەهەموو ئەو هەڕەشانە تێپەڕ بێت وئەو زەبرانەی کە لێمان دران،  لەناومان نەبات. پارتی ئازادیی کوردستان پارتێکی دامەزراو و بێ قەیرانی فکری وسیاسییە. ئەو بێ قەیرانی و دامەزراوەییە، هێز و توانای پێ بەخشیوە. هەر بۆیە لە ٣٠ ساڵی ڕابردوو دا دیتووتانە کە لە خاڵەکانی وەرچەرخان و لەکاتە ئەستەماکاندا چۆن ئەم پارتە توانیویەتی دەوری خۆی بگێڕێت. ئەگەر پارتی ئازادیی کوردستان خاوەنی ئەم ستراکچێر و دامەزراوەییە نەبوایە، هەرگیز نەیدەتوانی ببێتە بەشێک لەشەڕی دژە تیرۆر و هەرگیز نەیدەتوانی حەماسەیەکی وەکوو حەماسەی پردێ تۆماربکات. 
   پارتی ئازادیی کوردستان  شانازیی ئەوەی هەیە کەبۆ یەکەمجار لەمێژووی کورد و لەمێژووی ناوچەکەدا و تەنانەت دەتوانم بڵێم لەمێژووی جیهاندا ژنی بەڕێکخستنی تایبەتی لەشکریی کرد. لە دەزگای فکریی PAK دا ژن جێگا و پێگەیەکی گەورەی هەیە. بۆیە پێیوایە دەبێت ژن خاوەنی دەسەڵات بێت، خاوەنی هێز بێت، بۆ ئەوەی هەم مافەکانی خۆی بپارێزێت ، هەم دەور بگێڕێت لەشەڕی ڕزگاریی نەتەوەییدا. بۆیە لە دەستپێشخەرییەک دا لەشکری تایبەتی ژنی دامەزراند و ئێستا لە قاڵبی تیپێک دایە. تیپی تەوارەکانی ئازادیی کوردستان. هەر لەم بەستێنەدا پێویستە ئاماژە بە هەنگاوی دامەزراندنی سپای میللیی کوردستان بکەم. پارتی ئازادیی کوردستان زۆر لە بەها و توخمەکانی دەوڵەتی جمهووری کوردستانی هەڵگرتبوو.لەدوایین یان باشترە بڵێم لە تازەترین دەستپێشخەریی ٢ساڵ لەمەوبەریدا، سپای میللیی کوردستانی دامەزراندەوە. ئەو سپایەی کەسپای دەوڵەتی جمهووری کوردستان بوو. PAK هەموو سەرمایەی مرۆڤی و دارایی وچەک وچۆڵی خۆی پێشکەشی ئەو سپایە کردووە، بۆ ئەوەی نەتەوەکەمان لە ڕۆژهەڵاتی کوردستان ببێتە خاوەنی یەک سپای یەکگرتووی لێهاتوو. بۆ ئەوی بەو جۆرە لەلایەک دەوری خۆی لەڕزگاریی خاکدا بگێرێت و لەلایەکی دیکەوە هەموو دەرفەتەکانی شەڕی ناوخۆیی بگرێت. 
    پارتی ئازادیی کوردستان لەسیاسەت ولەهەڵوێست دەربڕین داپارتێکی ڕوون و ڕاشکاوە،PAK لەخەباتی خۆیدا هیچ پێچ پەنایەکی نییە. شتێکی نییە بۆ شاردنەوە لەنەتەوەکەمان. PAK سیاسەت وهەڵوێست وباوەڕەکانی خۆی لە حزووری نەتەوەی خۆیی و لەبەرانبەر بێگانە و لەبەرانبەر دوژمنانیشدا هەر بە یەکجۆر بەڕوونی دەردەبڕێت. 
کۆی ئەم تایبەتمەندییانە واتە تایبەتمەندی مەیدانی بوونی پارتی ئازادیی کوردستان، تایبەتمەندی بایەخدان بەبیر و فەلسەفەی سیاسی و داهێنانەکانی و تایبەتمەندییە ڕێکخراوەییەکەی وادەکات کە پارتی ئازادیی کوردستان پارتێکی جێ متمانە وهیوا بێت. داوا لە ڕۆڵەکانی نەتەوەکەم لەڕۆژهەڵاتی کوردستان دەکەم، متمانە بە پارتی ئازادیی کوردستان بکەن، پشتی پارتی ئازادیی کوردستان بگرن، هێز ببەخشن بەپارتی ئازادیی کوردستان و ببنە ئەو هێزەی کەپارتی ئازادیی کوردستان بتوانێت بە سەربەخۆیی نەتەوەیی و بە دامەزراندنی دەوڵەتی نەتەوەیی بگات. 
    لەم بۆنەیەدا سڵاو دەنێرم بۆ ئێوە ڕۆڵە کۆڵنەدەرەکانی نەتەوەکەمان کە سەرەڕای هەموو ئەو زیانانەی کەوێتان کەوتووە وسەرەڕای قووربانییەکانی ١٠٠ساڵی ڕابردوو، سەرەڕای هەبوونی پیلانەکانی سەرکوت و ئێعدام و ئاسمیلاسیۆن، بەڵام خۆتان ڕاگرت ونەتوانەوە.
   سڵاودەنێرم بۆ. ڕێبەرانی شەهیدمان لەهەموو دەڤەرەکانی کوردستان، سڵاودەنێرم بۆ شێخ عووبەیدووڵڵای نەهری، سمکۆی مەزن، سەردار ئەسعەدی بەختیاری، بی مەریەمی بەختیاری، شێرعەلی مەردانخانی بەختیاری، شێرعەلی مەردانخانی بیرانوەند. سڵاو دەنێرم بۆ ژنەشۆڕشگێڕی کورد قەدەمخێری لۆڕ، سڵاو بۆ شامحەمەدی مەلەکشاهی، بۆ داودخانی کەڵهوور و بۆ پێشەوا قازی محەممەد و یاری بەوەفای لەکۆماری کوردستان مستەفابارزانی. سڵاو دەنێرم بۆڕێبەرانی گەورەمان لەپارچەکانی دیکەی کوردستان:شێخ عەبدوولسەلام بارزانی، شێخ سەعیدی پیران،شێخ مەحمودی حەفید، بۆ. سەیدڕەزای دەرسیم ، بەدرخانی مەزن، ئێحسان نوری پاشا و هەموو ئەومرۆڤانەی کەلەسەرکوردبوون  ولە سەر سووربوون لەسەر ناسنامەی کوردبوون گیانیان بەخت کرد.یان لەپڕۆسەی بەرەنگاربوونەوەی داگیرکەرانی کوردستاندا گیانیان سپارد. جارێکی دیکە سڵاوی خەبات وتێکۆشان و ئەمەگ و وەفا پێشکەشی ڕێبەری شەهیدمان کاک سەعید و ئەو قافڵەلە شەهیدانمان دەکەم کە بەدوای ئەو دایەک بەیەک لەمەیدانەکانی بەرەنگاریی یان لەزیندانەکان یان لەبەرەکانی جەنگ لەگەڵ داعش و نەبەردیی مێژوویی پردێ دا خوێنیان ڕژا. سڵاو بۆبنەماڵەی شەهیدەکانمان ، بۆبنەماڵەی زیندانییەکانمان ، سڵاو بۆ ڕۆڵە نەبەرد و نەبەزەکانی سپای میللیی کوردستان کەهیوا و هێز و داهاتووی نەتەوەیەکن.

تێبینی: ئەم دەقە لە وتەوە کراوەتە نووسین. no