بەڕێوەچوونی پرسەی جەنابی عەلی قازی محەممەد لە هەولێر و سلێمانی

20/07/2022

بەڕێوەچوونی پرسەی جەنابی عەلی قازی محەممەد لە هەولێر و سلێمانی

دوێنێ سێشەممە و ئەمڕۆ چوارشەممە ٢٩ی پووشپەڕی ٢٧٢٢ کوردی، ٢٠ ژوولای زایینی، پرسەی خوالێخۆشبوو جەنابی عەلی قازی لە مزگەوتی سەواف/ ی شاری هەولێر و مزگەوتی پێشەوا قازی محەممەدی شاری سلێمانی و دیوەخانی جاف، بەڕێوەچوو.
رێوڕەسمی پرسەکە بە سەرپەرشتیی کوڕانی کاک عەلی، بنەماڵەی قازییان، بنەماڵەی  جاف و پارتی ئازادیی کوردستان و بە بەشداریی بەرپرسانی حکوومی و حیزبیی باشووری کوردستان و لایەن و کەسایەتییە سیاسی و کۆمەڵایەتی و ئایینیی وهونەرییەکانی هەرچوارپارچەی کوردستان بەڕێوەچوو.

عەلی قازی ساڵی ١٩٣٣ لە مەهاباد لەدایک‌بووە، لەکاتی کۆماری کوردستان‌دا ١٣ ساڵان بووە، پاش رووخانی کۆمار بە پیلانی دەوڵەتی داگیرکەر لە رۆژهەڵاتی کوردستان دادەبڕێندرێ و دەنێردرێتە وڵاتی ئاڵمان.
لەساڵی ٢٠٠٥ بە بەیاننامەیەک ھاتنی بۆ ریزەکانی پارتی ئازادیی کوردستان راگەیاند. لە ٢٠٠٦ لە کۆنگرەی یەکەمیدا بە سەرۆکی پارتی ئازادیی کوردستان هەڵبژێردرا. ساڵی ٢٠١٧ لە سەر بڕیاری خۆی بەهۆی هەڵکشانی تەمەن و نەخۆشیی لەو ئەرکە و کاری سیاسیی دەستی ھەڵگرت.
لە ١٠٫٧٫٢٠٢٢ لە یەکێ لە نەخۆشخانەکانی ئاڵمان کۆچی دوایی کرد. لە ١٨٫٧٫٢٠٢٢ تەرمی خوالێخۆشبوو لەسەر ئەرکی بەڕێز مەسروور بارزانی سەرۆک وەزیرانی هەرێمی کوردستان گەڕێندرایەوە هەولێر و لە رێوڕەسمێکی پڕشکۆدا لە فڕۆکەخانەی نێودەوڵەتیی هەولێر لەلایان بەڕێز نێچیرڤان بارزانی سەرۆکی هەرێمی کوردستان و نوێنەرانی لایەنە سیاسییەکان پێشوازیی لێکرا.پاشان بە ئەمانەت ھەتا ڕزگاریی ڕۆژھەڵاتی داگیرکراو لە کەلار ، لەلای گڵکۆی مریەم خانمی خوشکیەوە ئەسپەردە کرا.
پارتی ئازادیی کوردستانPAK
کۆمیتەی ڕاگەیاندن
٢٩ ی پووشپەڕی ٢٧٢٢ ک
٢٠ ی ژوولای ٢٠٢٢ ز