پارتی ئازادیی کوردستانPAK پاڵپشتیی هەمەلایەنەی لە کاکەییەکانی باشووری نیشتمان ڕادەگەیەنێت

پێش 3 هەفتە

پارتی ئازادیی کوردستانPAK
پاڵپشتیی هەمەلایەنەی لە کاکەییەکانی باشووری نیشتمان ڕادەگەیەنێت

لە درێژەی تاوان و جینایەتەکانی حەشدی شەعبی بەرفەرمانی هێزی قودسی سپای پاسداران لە دژی ڕۆڵەکانی کوردستان لە دەڤەرەکانی دووز و داقووق و کەرکووک و گوشاری بەردەوامیان بۆ چۆڵکردنی گوند و ئاوەدانییەکانی کاکەییەکان؛ رۆژی شەممە یەکی گەلاوێژ، ڕێکەوتی ٢٣ ژوولای ٢٠٢٢، ڕۆڵەیەکی پێشمەرگەی کاکەییان خستە بەر شکاندنی شکۆی ئینسانیی و  ئەشکەنجە و ئازاری بێپاساو.
   لەو کاتەوە هەتا ئێستا هاووڵاتیانی کاکەیی دەڤەرەکە، بە پشتیوانی باقی خوشک و برا کوردەکانیان دژی ئەو دەسدرێژیی و تاوانە، بوێرانە وەدەنگ هاتوون و پێیان لە سەر سزادانی تاوانبارانی خوڵقێنەری ئەو تاوانە داگرتووە. کاکەییەکان سوورن لەسەر ئەوەی ڕێگا نەدەن شکاندنی شکۆ و کەسایەتیی ڕۆڵەکانی نەتەوەکەمان بەسەر دارودەستەکانی حەشدی شەعبییەوە پچێت و سنوورێک بۆ گوشار و تاوانی هێزەکانی بەرفەرمانی تاران لە دەڤەرەکەیان دابندرێت. بێگومان هەتا کەرکووک و خانەقین و مەخموور و شنگال لە داگیری حەشدی شەعبییدا بن، سەر و ماڵ و شکۆی ڕۆڵەکانی کوردستان پارێزراو نابێت.
   پارتی ئازادیی کوردستان وێڕای مەحکووم کردنی ئەو تاوانەو هەموو ئەو تاوان و کردەوە چەپەڵانەی لە پاش گەلەکۆمەی نێودەوڵەتی ئۆکتۆبری ٢٠١٧، حەشدی شەعبی بە پاڵپشتیی سپای پاسداران لە دەڤەرە کوردستانییە داگیرکراوەکان خوڵقاندوویانە، پشتیوانیی هەمە لایەنەی خۆی لە کاکەییەکان و ماف و داوا ڕەواکانیان ڕادەگەیەنێت.هاوکات سپای میللیی کوردستان ساز و ئامادەیە بۆ بەرەنگار بوونەوەی هەر جووڵە و دەسدرێژییەکی هێزەکانی حەشد و سپای پاسداران بە دژی کاکەییەکان لە هەر دەڤەرێکی باشووری نیشتمان.

پارتی ئازادیی کوردستانPAK

٤ی گەلاوێژی٢٧٢٢ک
٢٦ی ژوولای ٢٠٢٢ز