ڕاگەیەندراوی ژمارە( 43 )ی ڕاپەڕینی کوچک و بەردی رۆژهەڵاتی داگیرکراو رۆژهەڵات لە راپەڕین بەردەوامە

26/09/2022

ڕاگەیەندراوی ژمارە( 43 )ی ڕاپەڕینی کوچک و بەردی رۆژهەڵاتی داگیرکراو
رۆژهەڵات لە راپەڕین بەردەوامە

لە دەیەمین رۆژی راپەڕینی کوچک و بەردی رۆژهەڵاتی داگیرکراو، خەڵکی بوێر و ئازای رۆژهەڵاتی نیشتمان بەردەوامن لە هەستان و راپەڕین دژی دەوڵەتی داگیرکەری ئێران.
لاوانی چاونەترس و کۆڵنەدەری شارەکانی کرماشان، قروە، مەریوان، سەقز، سنە، شنۆ و بۆکان بە درێژەدان بە رابوون دژی دەوڵەتی داگیرکەر، بە رۆژ و شەو دژی تاوان و جینایەتەکانی تاران، لە گۆڕەپان و شەقامەکان درێژە بە هەڵوێستی بوێرانەیان دەدەن و بەگژ هێزەکانی بەر فەرمانی دەوڵەتی داگیرکەردا دەچنەوە.
بەکارهێنانی هێز، توندوتیژی، گرتن، لێدان، گازی فرمێسک‌ڕێژ، تەقەکردنی راستەوخۆ، بریندارکردن و شەهیدکردنی رۆڵەکانی کوردستان، ئاگری قینی نەتەوەی کورد دژی ستەم و تاوانەکانی داگیرکەری فارس دانامرکێنێتەوە. ئیرادە و باوەڕ و یەکگرتوویی بەهێزترین چەکی کوردە لەبەربەرەکانێی هێزەکانی دەوڵەتی داگیرکەردا.
سڵاو لە ئیرادەی بەهێز و هەنگاوی بوێرانەی خەڵکی راپەڕیوی رۆژهەڵاتی داگیرکراو.

پارتی ئازادیی کوردستانPAK
کۆمیتەی ڕاگەیاندن
٤ رەزبەری ٢٧٢٢ک
٢٦ سێپتامبری ٢٠٢٢ز


کاتژمێر: ٢٢:٢٥