ڕاگەیەندراوی ژمارە( 44 )ی ڕاپەڕینی کوچک و بەردی رۆژهەڵاتی داگیرکراو (کرماشان، سنە و مەهاباد لە یازدەیەمین رۆژی راپەڕین‌دا)

27/09/2022

ڕاگەیەندراوی ژمارە( 44 )ی ڕاپەڕینی کوچک و بەردی رۆژهەڵاتی داگیرکراو
(کرماشان، سنە و مەهاباد لە یازدەیەمین رۆژی راپەڕین‌دا)

خەڵکی راپەڕیوی کرماشان، سنە و مەهاباد لە یازدەیەمین رۆژی راپەڕین‌دا پێداگرن لەسەر هەنگاوی نەتەوەیی و جوامێرانەیان؛ بەردەوامن لە راپەڕین و لە مەیدانی بەرەنگاربوونەوەی دەوڵەتی داگیرکەردان.
یازدە رۆژە لاوانی رۆژهەڵات بە رۆژ و شەو، گۆڕەپانی شارەکانیان کردووەتە سەنگەری بەرگری و بەرخۆدان؛ کچان و کوڕانی چاونەترس لە کووچە و کۆڵانەکاندا ئازایانە بەرانبەر هێزە پۆشتە و پەرداخەکانی دەوڵەتی داگیرکەر راوەستاون؛ لەبەرانبەر جەور و ستەمیان مەیدانیان چۆڵ‌نەکردووە و بە ئیرادەیەکی پتەوەوە درێژە بە رابوون دژی دەوڵەتی داگیرکەر دەدەن.
دەوڵەتی داگیرکەری ئێران وێڕای سەرکوت و رەفتاری نامرۆڤانەی لەگەڵ خەڵکی راپەڕیوی رۆژهەڵات، بە سنووردارکردنی هێڵەکانی ئەنتەرنێت و تۆڕە کۆمەڵایەتییەکانیش ئەوپەڕی توانای خستووەتە گەڕ و رێگری‌دەکا لەوەی دەنگ و رەنگی خەڵکی راپەڕیو بگاتە دەرەوە؛ لەگەڵ ئەوەشدا بڵێسەی راپەڕین سەرلەبەری رۆژهەڵاتی کوردستانی گرتووەتەوە و  هیچ هەوڵ و پیلانێکی ئێران ناتوانێ ئەم راپەڕینە دامرکێنێتەوە.
پارتی ئازادیی کوردستانPAK
کۆمیتەی ڕاگەیاندن
٥ رەزبەری ٢٧٢٢ک
٢٧ سێپتامبری ٢٠٢٢ز


کاتژمێر: ٢٢:٣٠