وه‌زاره‌تی ده‌ره‌وه‌ی ئه‌مه‌ریكا ئیدانه‌ی تۆپبارانه‌كانی ئێران بۆ سه‌ر چه‌ند ناوچه‌یه‌كی هه‌رێكی كوردستانی كرد.

28/09/2022

ئه‌مڕۆ چوارشه‌ممه‌ (28ی ئه‌یلوول/سێپتێمبه‌ری 2022)، وه‌زاره‌تی ده‌ره‌وه‌ی ئه‌مه‌ریكا له‌ په‌یامێكدا ئیدانه‌ی تۆپبارانه‌كانی ئێرانی كرد و به‌ پێشڵێكردنی سه‌روه‌ری عێراقی وه‌سفكردووه‌.
له‌ په‌یامه‌كه‌ی وه‌زاره‌تی ده‌ره‌وه‌ی ئه‌مریكادا هاتووه‌، مووشه‌كبارانكردن و تۆپبارانكردنه‌كانی ئێرانی به‌ "بێ پاساو" له‌قه‌ڵمدا و به‌ پێشێڵكردنی سه‌روه‌ری و سه‌قامگیری عێراقی داناوه‌.
هه‌روه‌ها وه‌زاره‌تی ده‌ره‌وه‌ی ئه‌مه‌ریكا نیگه‌رانی خۆی له‌باره‌ی ژماره‌ی قوربانییه‌كانی بۆردومانه‌كانی ئه‌مڕۆوه‌ ده‌ربڕیوه‌ و پشتیوانی خۆی بۆ گه‌ل و حكومه‌تی عێراق دووپاتكردووه‌ته‌وه‌.
ئەمڕۆ چوارشەممە (28ی ئه‌یلوول/سێپتێمبه‌ری 2022)، بارەگا و کەمپی نیشتەجێبوونی خەڵکی سڤیلی حزبی دیموکراتی کوردستان لە کۆیە،  کۆمەڵەی زەحمەتکێشانی کوردستانی ئێران لە سلێمانی و پارتی ئازادی کوردستان (پاک) لە پردێ، بوونە ئامانجی هێرشی درۆن و تۆپخانەكانی ئێران.
به‌گوێره‌ی دواهه‌مین ئاماری وه‌زاره‌تی تەندروستی حکومەتی هەرێمی کوردستان، له‌ ئه‌نجامی تۆپبارانه‌كانی ئه‌مرۆدا، نۆ کەس گیانیان لەدەستداوە و 32 كه‌سی دیکەش برینداربوونە.

Kurdistan24