ڕاگەیەندراوی ژمارە( 78 )ی ڕاپەڕینی کوچک و بەردی رۆژهەڵاتی داگیرکراو "ڕاپەڕین تا ڕاماڵینی داگیرکەران لە نیشتمان"

08/11/2022

ڕاگەیەندراوی ژمارە( 78 )ی ڕاپەڕینی کوچک و بەردی رۆژهەڵاتی داگیرکراو
"ڕاپەڕین تا ڕاماڵینی داگیرکەران لە نیشتمان"

ئەمڕۆ سێشەممە ١٧ خەزەڵوەڕ، لە پەنجا و سێهەمین رۆژی راپەڕینی رۆژهەڵاتی کوردستان‌دا، خەڵکی راپەڕیو و نیشتمانپەروەری مەریوان لەسەر گڵکۆی شەهید نەسرین قادری کۆبوونەوە و درێژەیان بە راپەڕین دا و بە دروشمی" هەتا کوردێک بـمێنێ ،کوردستانیش دەمێنێ " و " دایە مەگری بۆ رۆڵەت، شەرتە بستێنین تۆڵە " و خوێندنی سروودی نەتەوەیی " ئەی رەقیب " و سروودی " ئەی شەهیدان "ـ خاوەندارێتییان لە خوێنی شەهید نەسرین و سەرجەم شەهیدانی راپەڕین کرد، و پاشان بە درێژەدانی هەڵوێستی بوێرانەیان لەسەر شەقامەکان بەردەوام بوون لە راپەڕینی نەتەوەییان.
لە دەوڵەتاوای کرماشان کچ و کوڕانی بوێر و قوتابیانی چاونەترس و راپەڕیو لەسەر شەقام و کۆڵانەکان مانەوە و بە دروشمدانەوە درێژەیان بە راپەڕین دا؛ لە سنە وێڕای بەردەوامیی راپەڕین لە گۆڕەپانەکان، قوتابی و مامۆستایانی زانکۆی پزیشکیی سنە لە دژی بڕیاری هەڵپەساردنی قوتابییانی راپەڕیو، مانیان گرت لە چوونە پۆلەکانی خوێندنەوە و پۆلەکانی زانکۆ بەچۆڵی مانەوە.
هەروەها راپەڕین لە شارەکانی کامیاران، مەهاباد و سەقز و ...هتد درێژەیان هەبوو و خەڵک لە کۆڵان و شەقامەکان‌دا بە دروشمدان و دروشم نووسین لەسەر دیوارەکان بەردەوامییان بە راپەڕین دا.

پارتی ئازادیی کوردستان PAK
کۆمیتەی راگەیاندن
١٧ خەزەڵوەر ٢٧٢٢ک
٨ نۆڤامبری ٢٠٢٢ز