ڕاگەیەندراوی ژمارە( 79 )ی ڕاپەڕینی کوچک و بەردی رۆژهەڵاتی داگیرکراو "ڕاپەڕین تا ڕاماڵینی داگیرکەران لە نیشتمان"

09/11/2022

ڕاگەیەندراوی ژمارە( 79 )ی ڕاپەڕینی کوچک و بەردی رۆژهەڵاتی داگیرکراو
"ڕاپەڕین تا ڕاماڵینی داگیرکەران لە نیشتمان"

ئەمڕۆ چوارشەممە ١٨ خەزەڵوەر، پەنجا و چوارەمین رۆژی راپەڕین و لە چلەی شەهیدانی برا بەلوچەکانمان، کە لەلایان هێزە داگیرکەرەکانی تارانەوە لە زاهیدان‌دا کۆمەڵکوژکران، لە سنە، سەقز، بانە، مەریوان، مەهاباد، قروە، کامیاران و بۆکان و زۆر لە شار و شارۆچکەکانی رۆژهەڵاتی کوردستان  بەشێوەی تایبەت  و بە مەبەستی دەربڕینی هاوخەمی و رێزگرتن لەو شەهیدانە، خەڵکی بەهەڵوێستی رۆژهەڵات بە مانگرتن و داخستنی دوکان و بازاڕەکان درێژەیان بە راپەڕین و هەنگاوی بوێرانەیان‌دا.
 هەر لەم بۆنەیەدا ڕێزدار  حسەین یەزدانپەنا سەرۆکی پارتی ئازادیی کوردستان لە پەیامێکیدا وێڕای دەربڕینی هاوخەمی بۆ روودانی ئەو تاوان و کارەساتەی دەوڵەتی داگیرکەری ئێران دژی نەتەوەی بەلوچ خولقاندوویەتی و  دەیان لە ڕۆڵەکانی بەلوچستان شەهید و سەدان کەسیان لێ بریندار و دەسبەسەرکران؛ داوای کرد رۆڵەکانی نەتەوەی کورد و نەتەوەکانی دیکەی بندەستی ئێران ، رۆژی هەینی ٢٠ خەزەڵوەر،  لەسەرتاسەری رۆژهەڵاتی کوردستان و ئێران درێژە بە راپەڕین بدەن.
پارتی ئازادیی کوردستان PAK
کۆمیتەی راگەیاندن
١٨ خەزەڵوەر ٢٧٢٢ک
٩ نۆڤامبری ٢٠٢٢ز