ڕاگەیەندراوی ژمارە( 90 )ی ڕاپەڕینی کوچک و بەردی رۆژهەڵاتی داگیرکراو "ڕاپەڕین تا ڕاماڵینی داگیرکەران لە نیشتمان"

پێش 2 هەفتە

 ڕاگەیەندراوی ژمارە( 90 )ی ڕاپەڕینی کوچک و بەردی رۆژهەڵاتی داگیرکراو
"ڕاپەڕین تا ڕاماڵینی داگیرکەران لە نیشتمان"

ئەمڕۆ سێشەممە ١ ی سەرماوەز، لە ٦٧ ـەمین رۆژی راپەڕینی رۆژهەڵاتی کوردستان‌دا، خەڵکی تێکۆشەر و چاونەترسی رۆژهەڵات سەرەتا بە مانگرتن و دواتر  بە رژانەسەر شەقام و گۆڕەپانەکان درێژەیان بە راپەڕین دا.
ئەمڕۆ بەوێنەی رۆژانی رابردوو لە زۆربەی شار و شارۆچکەکانی رۆژهەڵات، لە سەلاسی باوەجانی، جوانڕۆ، کامیاران، کرماشان، مەریوان، دێهلوران، پیرانشار، سنە، سەقز، بانە، مەهاباد، بۆکان، شنۆ، ورمێ، روانسەر، دێولان، دزەی مەرگەوەڕ و ئەندیمشک، خەڵکی تێکۆشەر و قارەمانی رۆژهەڵات، بە مانگرتن و رژانەسەر شەقام و کۆڵانەکان و مامۆستا و قوتابییان لە زانکۆکان‌دا لە راپەڕین بەردەوام بوون.
 هێزەکانی دەوڵەتی داگیرکەر بە میلیتاریزەکردن و بڵاوەپێکردنی هێزێکی زۆر لە شارەکان و سوڕانەوەی هەلیکۆپتەر بە ئاسمانی ژمارەیەک لە شارەکاندا و بە تەقەی راستەوخۆ و پەلاماردانی خەڵکی راپەڕیو هەموو هەوڵی خۆیان بۆ سەرکوتی راپەڕین خستەگەڕ. سەرەڕای هەموو ئەوانە راپەڕین لە رۆژهەڵاتی کوردستان بەردەوامە و خەڵکی راپەڕیو پارێزگارییان لەم راپەڕینە مەزنە کردووە کە ٦٧ رۆژە درێژەی هەیە.

پارتی ئازادیی کوردستان PAK
کۆمیتەی راگەیاندن
١ سەرماوەز ٢٧٢٢ک
٢٢ نۆڤامبری ٢٠٢٢ز